Tura, Naitung 07: Ka 6th Edition jong ka Friendly Motocross Challenge 2024 kala long ha ka 5 bad 6 tarik u Naitung ha Molmegre kaba jngai kumba 43 kilometer na Tura, West Garo Hills.
Ia katei ka jingiakob la pynlong da ka Durama Motorsports and Adventure Club, ha kaba 30 ngut kila wan iashimbynta na kylleng jong ka rilum Garo ha kitei ki ar sngi.
Ki nongniah kila iashimbynta ha ki jingiakob ki bapher bapher kiba kynthup haka kyrdan Beginner, Novice, Expert, 2 Stroke, Open, Scooty bad Legend. Ka jaka niah kaba ktieh khyndew bha, ha kaba ki thuk thuk kila hap ban iaid lyngba ban poi shaka thong.
U Salgira T. Sangma (Bajong), ula wan nyngkong ha ka kyrdan Beginners bad Novice. Evander M. Sangma (Molmegre) ula long u lahduh ha ka Expert bad Open category katba u Tenzy Sangma ula pyni ia la ka sap ka phong ha ka 2 Stroke (1st), Open (3rd) bad Legend (2nd) category.
Ki nongjop ki long kumne harum:-
Beginners:
1. Salgira T sangma (Bajong)
2. Kanan Sangma (Gambegre)
3. Heyko Momin (Tura)
Novice:
1. Salgira T sangma(Bajong)
2. Rakkim Marak(Tura)
3. Ezikiel sangma (Tura)
Expert:
1. Evander M sangma (Molmegre)
2. Chengseng ch marak
3. Ringran M sangma
Stroke:
1. Tenzy Sangma
2. Ringrang Sangma
3. Apnine Dangma
Open Category:
1. Evander M. Sangma
2. Chengseng Ch. Marak
3. Tenzy Sangma
Scooty:
1. BendKelyan Sangma
2. Balkim Marak
3. Evan D Sangma
Legend:
1. Natash Yuvraj
2. Tenzy Sangma
Haba iakren bad KA SHLEM, u John Huberth D Sangma, u dkhot jongka Club, ula ong, “Ngi pynlong ia kum kine ki jingiakob haduh 3-4 sien ha ka shi snem. Ka jingthmu ban pynlong ia ka jingiakob ka long ban wanrah ia ka jingkylla ha kaba iadei bad ka kam jngohkai. Ngi kwah ba ki briew na kiwei pat ki jylla kin wan peit ia ki jaka kiba itynnad, ban iakynduh ia ki riewlum ki jong ngi bad ban pynsngewtynnad ruh ialade da kaba leit shangkai da ki thuk thuk hapoh rilum Garo”.
Ula ong, “Ngi dang pynkhreh ban ioh ban pynlong ia ka jingiakob na ka bynta baroh ki nongniah thuk thuk na kylleng ki bynta jong ka Ri, ngin sa pynmih ia ka jingpynbna paidbah shen”.
Kumban shu kdew ka Garo Hills kala sakhi ia kiba bun tylli ki jingiakob kiba kum kitei, kaba la pynlong ia ki samla bad ia kito kiba la pyntbit ha katei ka bynta ban kilan met bad pynkhreh bha ialade baroh shi snem ban ioh kiew ha ki rynsan ban ioh pdiang ia ki khusnam. Namar ka jingdon dang khyndiat tylli ki Club jong ki nongniah thuk thuk, kumta haba don ki jingiakob la iohi ia ka mynsiem jong ka jingiatylli hapdeng jong ki nongiakhun.
