Shillong, Nailur 28 : Saw ngut ki samla pule ka North Eastern Hills University (NEHU), kila tyngshain ha ka G20 University Connect Finale, kaba long ha Bharat Mandapam, New Delhi.
Ia kane ka G20 University Connect Finale la pynlong da ka Research and Information System for Developing Countries (RIS), New Delhi mynta u bnai Nailur.
Palat 3000 ngut ki samla pule, ki Vice Chancellor bad ki Nonghikai na kylleng ka Ri India kynthup ia 4 ngut ki samla pule ba stad na NEHU, kiba mihkhmat ia ka Jylla Meghalaya bad ba synran da u Dr Davidson Pyngrope, Asst Professor ka Tnad Nanotechnology and Public Relation Officer ka NEHU, kila iashimbynta ha kane ka lympung,
Kine ki samla kiba mihkhmat ia ka NEHU bad ka Jylla ki dei ka samla Rimiki Shylla, Arwotki Rymbai, Bankhein Rongrin bad Prastuti Konwar. Kine ki samla ki dei napdeng ki 3000 ngut kiba la iasam lang ia kajuh ka rynsan bad u Myntri Rangbah Duh ka Ri, kaba pyni ia ka jingshemphang bad jingminot thop jong ki ha ka jingpule.
Ka samla Rimiki Shylla kaba ioh ia ka lad ban ai jingkren ha ka jingiadonlang u Myntri Rangbah Duh ka Ri, kala pynpaw ia ka jingsngewnguh da kaba ong “Nga ai khublei ia ka RIS bad ka Sorkar India kaba ai ha ngi ia kane ka lad ban iashimbynta ha kane ka prokram, kaba pyn plied ia ki khmat jong ngi ba ngin trei borbah ha kaban tei iala ka jong ka Ri”.
“Ngi tip shaphang ka G20 tang na ki khubor bad ki video hynrei, ngi la ioh ka lad mynta ban tip kaei kata ka G20 hadien ba ioh iashimbynta ha kane ka prokram. Nga kynty ia ki para samla pule ba kin don ia ka jingkitkhlieh bad ban leh ia ki kam kiban tei ia ka imlang sahlang, ka jylla bad ka Ri” kala ong.
Kumjuh ruh u samla Arwotki Rymbai ula pynpaw “Ngam pat ju mih shabar jong ka Jylla bad mynta nga la ioh ka lad ym tang ban wan iuhkjat ha ka Nongbah ka Ri hynrei ruh ban iohsngew ia ki jingkren ba ai mynsiem khamtam ka jingkren na u Myntri Rangbah Duh, kaba la pyrsad mynsiem ia kiba bun ki samla pule, ym tang ia kito kiba don hangne hynrei ia kito kiba peit online”.
Ka G20 Connect Finale ka dei ka sienjam bala wanrah da ka jingthmu ban wanrah ia ka jingiajan hapdeng ki stad ki jhad (Academia) bad ki nongmihkhmat jong ki Ri ka pyrthei.
Pule lang ia kane: Iehnoh kam u Vice Chairman ka HNLC, thung bujli da uwei u Nongialam sha ka jingiakren iasuk
