Shillong, Nailur 11 : U Myntri Rangbah ka Jylla Conrad K Sangma ha ka sngi Palei, ula iathuh ba ka Sorkar ka dang bishar bniah ban pyntreikam da ka PPP (Public-Private Partnership) ha kaban pyniaid ia ka Tura Medical College, ka ban ailad ia ki riew shimet ban pyniaid ia ka College katba ka Sorkar kan pyniaid hi ia ka Civil Hospital bad MCH.
“Ka don ka jingsngewthuh bakla ba ka kynhun shimet kan pyniaid ia ka Tura Civil Hospital bad MCH. Nga kular, ka jingkylli kam mih satia ba ka kynhun shimet kan shimti ia ka jingshakri ka civil hospital bad MCH. Ka kynhun shimet ka ban iatreilang bad ka Sorkar kan hap thaw hi la ka jong ka hospital” ong u Conrad haba jubab ha ka mat iatai ba lyngkot bala wanrah da u Nongialam ka Liang Pyrshah Mukul Sangma ha Iingdorbar, halor ka jing pyrshah ia ka rai ka Sorkar ban pyntreikam da ka PPP ia ka Tura Medical College.
U Myntri Rangbah ula ban jur ba ka kam ba hakhmat eh jong ka Sorkar ka long ban pynthikna ia ka jingai jing shakri ha ka koit ka khiah kaba paka tam ia ki nongshongshnong.
U Myntri Rangbah ula kren ruh halor ka jingduna ba bun bah ia ki doktor specialist ha ri-lum Garo, kaba kot kumba 50% ban pynbiang ia ka jingdonkam ki nongshongshnong. “Ban pyniaid ia ka medical college kan donkam wat khambun ki nongtrei” ula ong haba bynrap “Ka jingeh kaba eh ka dei ki nongtrei namar bun I briew kim kwah ban wan wat lada ngi long kiba kloi ban siew”.
U Conrad ula kular ruh ba ka Sorkar jong u ka long kaba kloi ban iakren ia ka jingtyrwa bad ki kynhun bapher bapher bad ka kloi ruh ban iakren bad ki liang pyrshah ban jam shakhmat.
“Ngim shym don hangne ban knieh noh ia ka hok jongno jongno. Ngim shym don hangne ban thom da ka bor iano iano ruh….hadien ka jingiasyllok kaba bniah, ngi la rai ba ka PPP ka dei kaba biang tam ban jam shakhmat. Ngi long kiba kloi ban iakren bad ki dkhot bad kmen ban iakren bad ban pyniiad shakhmat ia ka kam” ula ong.
U Myntri Rangbah ula kyntait ruh ia ka jingsngewthuh bakla ba ki samla pule kin hap ban siew T.50 lak haduh T.1 klur ka bai klas lada pyntreikam da ka PPP ban pyniaid ia ka Tura Medical College.
Ula pynshai ba ka bai klas na ka bynta ka 63% ka seat bala bhah sha ka bhah pule ka Sorkar, yn ai subsidy da ka Sorkar, ha kaba ki samla pule kin hap siew tang T.30,000. Yn shah ia ka kynhun shimet ba pyniaid ia ka college ba kan shim ia ka bai klas na ki 37% ki seat kiba tam, hynrei ka Committee kan rai ia ka dor jong ka bai klas.
“Ngan kren da kaba shai ba kito ki 80 seat lane 63% ki seat, ka jingkylli kam mih ba ki samla pule kin siew T.50 lak lane T. 1 klur ka bai klas. Lada la mih ka Committee bad ka bai klas ka dei ban long T. 5 lak bad ka Sorkar kan ai subsidy bad siew T. 4.7 lak” ong u CM.
Hashuwa kane, ka Myntri ka Koit ka Khiah Kong Ampareen Lyngdoh haba ai jubab, kala ong ba ka rai ban iaid da ka PPP mode ka dei kaba la shim hadien ka jingbishar ia kiei kiba long ba man bad ki jingeh ha kaban pyniaid hi ia ka medical college.
Ka Myntri kala kdew ia ka jingduna ba bun bah ia ki nonghikai kiba donkam ban lah pyniaid ia ka medical college, kaba long haduh 97 ngut ki nonghikai hynrei tang 20 ngut ki doktor kila pynpaw ia ka jinglong ba kloi ban shakri kum ki nonghikai.
Kala pynshai ba ka Sorkar kan bat hi halade ia ka jinglong trai ia ka jaka bad ka building katba ka kynhun shimet ba iatreulang kan shu pyniaid ia ka medical college bad ia ka hospital ban pynthikna ia ka jingdon ki nonghikai kiba biang ka kyrdan. Haduh 80 tylli ki seat yn buh hapoh ka bhah ka Jylla bad 37% yn pyniaid da ka quota seat.
 ha kaban pyniaid ia ka Tura Medical College, ka ban ailad ia ki riew shimet ban pyniaid ia ka College katba ka Sorkar kan pyniaid hi ia ka Civil Hospital bad MCH.){kind=link}