Nongpoh, Naitung 02 : Ki paid Nongshongshnong ka Mawiong Nonglyndoh, kaba hap ha Raid Nonglyngdoh, Ri-Bhoi District, hynne ka sngi, kila tur paidbah sha ka Ophis treikam u Sub-Divisional Officer (SDO) ka Tnad PWD, Nongpoh ban dawa shna pynbha noh mardor ia ka surok Pahambir-Mawiong.
Kane ka jingiatur paidbah kala mih namar ka jingjot rathai jong ka surok ha ki katto katne ki bynta, kaba la pynsyrtok ia ka leit ka wan, ka iaid ka ieng jong ki paidbah ka thain. Kane ka surok kala jot hadien ka jingpynpra ia ka surok ban shna pynheh ia ka madan ialehkai, kaba la ktah kumba 80 meter eiei ka bynta jong ka surok.
Ia kane ka jingiatur paidbah la ialam hi da u Rangbah Shnong ka Mawiong Bah Mathius Maring ha ryngkat u Asst Rangbah Shnong Bah Savio Maring, u Secretary Schnong bah Repil Makri lem bad ki nongialam sengbhalang.
Haba kren sha ki nongthoh khubor, u Bah Mathius Maring ula iathuh ba ka jingjot jong ka surok ka dei namar ka jingshna pynheh ia ka madan ialehkai ha ka shnong Pahambir Them, kaba la pynthut pat ia ka leit ka wan u paidbah ba manla ka sngi.
Ula ong, kane ka bynta jong ka surok kala pynsyrtok shikatdei eh ia ki paidbah ha ka leit ka wan, ki nongrep ha ka kit ka bah ia ki marrep, ki khynnah skul kiba leit skul, khamtam ha ka aiom slap kaba dap da ka ktieh shi rynieng.
U iathuh ba ka Ophis u SDO kala kular ban sa pynbna noh ia katei ka surok haba maham ba lada kane ka jingkular kam treikam, ka Shnong kan ym banse ban shim da kiwei ki sienjam ba tyngeh ban ioh ia ka surok kaba bha.
 ka Tnad PWD, Nongpoh ban dawa shna pynbha noh mardor ia ka surok Pahambir-Mawiong.){kind=link}