Shillong, Rymphang 12 : Katto katne ngut ki Nongshong dukan madan, hynne ka step sngi Nyngkong, kila hiar ban pynlong jaka iew biang ha Mawiongrim View Point, kaba long pyrshah ia ka adong shnong bad la kynnoh ruh ba ka dei ka jingpynkhein ia ka hukum jong ka Iingkashari Meghalaya High Court.
Kumba 5-6 tylli ki dukan madan kila mih biang ha kane ka jaka jngoh kai ia ka pung Umiam, kiba kynthup ia ki nongdie sha, ki dukan die chips, ki soh ki pai, tiar shna kti bad kiwei kiwei.
Kane ka jingmih ki dukan madan ha kane ka jaka kala pynkyndit ia ka Dorbar Shnong Mawlai Mawiongrim, kaba la khang pyrshah ban buh dukan ha kane ka jaka namar ka jingpynjaboh bad jingmih ki kynrum kynram na ka por sha ka por.
Ka Dorbar Shnong hapoh ka jingialam u Rangbah Shnong Bah Sorbar L Nongpiur kala leit ban tuklar ia kane ka kam hynrei kine ki nongshong dukan madan kila pyneh beit triang haduh bala mih ka jingiapyni nia kaba jur bha hapdeng jong ki.
Ki Pulit ka Mawlai Police Stationn ruh haba ioh jingtip ia kane ka jingjia, kila hiar wut wut sha katei ka jaka jngoh kai ban tehlakam ia kano kano ka huri hura kaba lah ban mih na ka jingkhang pyrshah jong ka Dorbar Shnong.
U Rangbah Shnong ka Mawiongrim Bah Sorbar L Nongpiur ula pyntip ba ka Dorbar Shnong kala khang pyrshah ban pynlong jaka iew ne shong die jingdie ha kane ka jaka jngohkai kaba iatip kum ka Ryndangbriew Viewpoint.
“Ki nongdie madan kila wanrah ia ka jingjaboh bad jing jakhlia ha kane ka jaka bad wat ka Iingkashari Meghalaya High Court kala pynmih ia ka hukum ba ym dei ban shah buh dukan ne die jingdie ha kane ka jaka” ula ong.
“Naduh ki por mynshwa ka Dorbar Shnong kala shem ba jyllei ki kam jaboh nalor ka jingjakhlia ha kane ka jaka bad dei namar kane, kala pyrkhing iaka jingiadie ia thied bad khang syndon iaki dukan bad kiba die madan hadien ba mih ka hukum naka Meghalaya High Court” ong u Bah Sorbar.
U Bah Sorbar ula kynnoh ba ki nongdie madan ki khlem kynjoh ktien iaka Dorbar Shnong bad kila shu wan shong die jingdie khlem ka jingioh jingbit.
Ula ong ba lada ki nong shong shnong ki wan mih shaka Dorbar Shnong, kum u Rangbah Shnong u kloi ban shim ki lad lynti ban wad jaka shawei ban ailad iaki ba shong die jingdie.
“Ki don 5-6 ngut ki trai Shnong ka Mawiongrim kiba kwah shong dukan ha kane ka jaka bad ka Dorbar Shnong kan sa shong ban iakren iaka jingeh jong ki bad kan sa wad jaka ban ai shong dukan ia kiba kin ioh kamai jakpoh ” ula ong.
Kat kum ka khubor, ki Pulit ki dang ap mynta ia ka jingwan jong ki Magistrate ki ban sa shim rai aiu ban leh ia kine ki nongdie dukan madan ba kynthup ruh ia ka jingkyndang da ka bor na kane ka jaka.
Hadien katto katne por, namar ka jingpyneh jong ka bor Shnong bala synran da ki Pulit, kine ki nongshong dukan madan kila lum noh ia ki tum ki tam baroh bad kila mih noh na kane ka jaka.
