Jowai, Risaw 23 : Ki paid riewngeit Hindu kila iatuid ban leit lehniam puja sha ka Durga Temple ba rim tam, kaba don ha Nartiang, West Jaintia Hills ban ainguh ia ka blei Durga.
Lah ban kdew ba ka Durga Temple ha Nartiang ka dei kaba la kynjoh ia palat 600 snem bad ka dei kawei na ki temple ba kongsan bha jong ki riewngeit hindu hapoh ka Ri.
Kadei kwei na ki 51 tylli ki Shakti Peethas bad kawei jaka khuid jong ki riewngeit ka Shaktism Sect ki paid Hindu. La ngeit ba ka lbong kadiang jong ka blei Sati Devi kala hap ha kane ka jaka.
Ki riew ngeit Hindu ha Jaintia Hills ki ngeit ba kane ka temple ka dei ka jaka sah ba shirta jong ka blei Durga.
Ha ka jingleh niam puja, kane ka temple ka ju kring ia bun bah ki riewngeit na kylleng ka Ri India. Don na ki riewngeit kiba ju rah ruh ia ki blang sha kane ka temple ban lehniam sha ka blei kum shibynta jong ka puja.
Ka jingpher ha ka lehniam hapoh ka Durga Temple ha Nartiang
Ka jinglehniam ha kane ka temple kam dei kaba ju leh kum sha ki ri thor ka Ri India hynrei kaba pher bha ha kaba la pynlong ia ka ha ka rukom ka jingleh niam ki hindu ba iakhleh lang bad ka rukom leh niam tynrai ki Khasi Jaintia.
Ha kane ka jnglehniam kaba iaid kat kum ka jinglehniam ki Khasi-Jaintia, ym shym la pyndonkam satia ia ka dur jong ki blei hynrei la pyndonkam da ki lakait bala pyndait da ki syntiew sngi (marigold) kum ka blei ban ia mane.
U Syiem jong ka Hima u dei u Chief patrol jong kane ka temple.
Wat hapoh kane ka temple, ki don haduh lai tylli ki dur blei, kawei ka dei ka dur blei jong ka Devi da u maw, kawei ka dur blei Durga kaba don pha tylli ki kti kaba kyrdem ia u Mahishasur da ka kjat.
