Agartala, Nailur 2: U MLA ka Tipra Motha u Philip Kumar Reang ha ka sngi ba-ar u la ujor da ka ejahar pyrshah ia u nongialam ka BJP Pratik Dev Varma bad ia u Symbud Myntri Rangbah Jishnu Dev Varma, da kaba kynnoh ba kila byrngem ban pyniap ia u ha MLA hostel ha Agartala.
Ia ka ejahar, la ujor ha NCC police station kaba hap hapoh ka West Tripura district, la kynnoh ba u Pratik Dev Varma—u khun jong u Lat ka Telangana u Tamilisai Soundararajan—bad ia ar ngut kiwei pat bad kila byrngem ban pyniap ha ka por ba ia kynad ha ka miet sngi Nyngkong.
U Reang u la pynpaw ha ka jingujor ba katba u dang ïakren bad kiba haïing jong u ha ka jaka sah ha quarter sorkar jong u (Ka kamra No. 209, MLA Hostel hajan ILS Hospital), lai ngut ki briew ki la wan shajan bad kila tuklar ruh ia ka jingiakren ka jong ki.
“Kine ki briew kila nang kham bitar bad kila sdang ruh ban pynmih ia ki kyntien ba khlem akor bad kiba jah burom bad kiba thmu beit ia u, da kaba ki ong ba kin ot ia ka ryndang jong nga” la kynnoh une u MLA ha ka ejahar.Shuh shuh u la kynnoh ba kine ki briew kila byrngem ban wanlang bad ki 400-500 ngut ki nongtrei ka BJP ban pyniap ia u bad kiba ha iing ha sem jong u.
Katkum u Reang, kine ki briew kila mih na MLA Hostel na kamra jong u Promode Reang, u MLA jong ka Santirbazar constituency. U la batai ia kane ka jingjia kum shi bynta jong “ka jingthmu bymman ba la suhthied bha” kaba buh jingma kaba khraw ia ka jingim jong u.
Une u MLA u la ong ba u la phet rieh sha ka quarter sorkar jong u para nongthaw ain u Biswajit Kalai, ha kaba ma u bad kiba ha iing jong u ki la leit rieh.“Ngi la kylla long ki bym shngaiñ shuh hadien ka jingbyrngem ba la pynpaw da kitei ki lai ngut ki nongleh kam sniew,” u la ong ha ka ejahar bad kyntu ia ki pulit ban shim khia katkum ka aiñ ban ïada ïa ka jingim bad ia ki jingdon jingem jong u.
Haba kren bad ki lad pathai khubor, u Reang u la ong ba ma u lem bad u paralok jong u kila ia kynduh ia u Myntri Rangbah ka jylla Tripura u Manik Saha ha ka step sngi ba-ar ban iathur halor ka bynta. “U Myntri Rangbah u la kular sha ki ba un sa shim da ka sienjam ba tyngeh ban iada ia ka MLA hostel bad kumjuh ruh ban tohkit ia katei ka jingjia”, la ong u Reang.
U Reang u la iathuh ba ka jingjia ka la jia ha ka por kumba 10 baje mynmiet.”Ki don lai ne saw ngut ki briew kiba la pyrshang ban pynthut ia ka jingiakren hapdeng kiba iing ha sem jong nga. Nga la kyrpad ia ki ban mih noh, hynrei ki la kyntait bad pyrshang ban thombor ia nga.Donbok ba la pyllait im ia nga da u paralok bad ki nongtrei jong ka hostel. Hapdeng kata, ki la kren bein ia nga da ki ktien kiba sniew bad ki la byrngem ban pynshitom ia nga,” u la ong.
