Agartala, Iaiong 23 : Ha ka jingpynbna kaba heh bha, u Myntri ka Sorkar Tripura bad Nongialam ka BJP Ratan Lal Nath ha ka sngi Ba-ar, ula pynbna ia ka khusnam ba T. 2 lak ia ki Polling Station jong ki san tylli ki Assembly constituency kiba poi buh eh ki nongthep vote ha ka elekshon Lok Sabha.
U Natt ula pynbna ia kane ha ka por ialap elekshon, bad ula ong ba un ai khusnam nalade shimet kaba kot haduh T. 2 lak ia ka Polling Station ha ki 5 tylli ki Assembly constituency kiba poi bun eh ki nongthep vote ha ka elekshon Lok Sabha.
Haba iakren bad ki lad pathai khubor, une u Nongialam ka BJP ula ong “Kane ka khusnam ba T. 2 lak kan leit sha ka Unit jong ka BJP kiba dei na kito ki Polling Station ba poi bun eh ki briew, ym ban ai ia ki riew shimet. Ki nongthep vote jong kine ki Polling Station ki lah ba thep ia ka vote jong ki ha kino kino ki kyrtong lane party kaba ki mon”.
Napdeng ki 5 tylli ki Assembly constituency, ka Agartala Assembly constituency ka dei kaba don bun eh ki polling Station kaba kot haduh 57 tylli bad la bud da ka Mohanpur kaba don 56 tylli, ka Teliamura kaba don 54, ka Amarpur kaba don 53 bad ka Khowai kaba don 52 tylli ki Polling Station.
Ka Agartala bad Mohanpur Assembly constituency ki dei kiba hap hapoh ka Tripura West Lok Sabha seat, kaba ka jingia thep vote kala dep myn ha ka 19 tarik Iaiong.
U Nath u dei uba bat ia ka shuki Myntri ka Tnad Parliamentary Affairs, Agriculture bad Power ha ka Sorkar BJP ba ialam da u Manik Saha ha Tripura.
