Agartala, Nohprah 19: Ka sain pyrthei hapoh ka kynhun NDA ha jylla Tripura kala synjor namar ka jingiapher jingmut kaba mih ha ka sngi Palei, hadien ba u khleh duh ka TIPRA Motha u Pradyot Kishore Debbarma u la kynthoh tyngeh pyrshah ia ka BJP bad ia u Myntri Rangbah Dr Manik Saha halor ka kynrum kynram kaba mih naka ktien Kokborok.
Haba kren ha ka jingialang thang dongmusa ba la pynlongda ka United Movement Committee for Roman Script, u Debbarma u la kynnoh ba ka sorkar jylla ba ka pyrshang ban pynbor ia ka jaitbynriew “da kaba shet kylla ia ka jingangnud” jong ki trai ri trai muluk.
U la pynpaw ba dei tang ki jaitbynriew riewlum jong ka Tripura kiba don ka hok ban rai ïa ka jingthoh ia ka ktien Kokborok, da kaba pynbna: “Ym dei ki briew kiba nabar, wat lada dei uba khlain bor katno katno ruh, um don hok ban pynbor ïa ki rai halor ka jingithuh ia ki trai ri trai muluk.”
La pynlong ia kane ka rally kum ka jubab pyrshah ia ka jingkren u Dr Saha uba pyrshah ia ka jingpyndonkam ia ki dak Roman na ka bynta ka Kokborok, kaba la pynmih ia ka jingbitar kaba jur hapdeng ki seng riewlum bad ki seng samla pule. Da kaba khot ïa u CM “ka jingwan tuklar kaba khlem nongrim,” u Debbarma u la maham ïa ka BJP ban pynduh jait ïa ka jingsngew trai ri trai muluk kaba don tynrai ha ka ktien bad ka culture.
Haba pynrem jur ïa ka jingkam u Myntri Rangbah ka Jylla ba ka TIPRA Motha ka la pynslem ïa ka Tiprasa Accord, u Debbarma u la kynnoh ba ka BJP kam shym la lah ban pyndep ïa ki jingkular ba la ai sha ki jaidbynriew riewlum. “Ngam shym la soi ia ka Accord ban kamai pisa ne ban ioh bor, lada ki jingkular kim urlong, ngan rah ia ka sur na ka bynta ki briew jong nga”, u la ong.
U la kyntait ruh ïa ka jingong jong u Dr Saha ba ka BJP kan jop lut ha baroh 28 tylli ki seat ha ka elekshon TTAADC ban wan, da kaba kynnoh ba ki nongïalam jong ka seng ki shah pynduh noh ïa ka jingïadei bad ki jingshisha kiba don ha ki jaka riewlum.
U Debbarma u la kop pyrshah beit sha ka BJP ha kaba iadei bad ki mat jong ka jingithuh (identity) bad ka jingsynshar kaba la pynjur ia ka jingia pher hapoh jong ka kynhun synrop, kaba la pynmih ia ka jingsngew artatien kaba thymmai halor ka jingiatylli hapoh ka kynhun NDA ha shwa ka jong ka TTAADC.
