Agartala, Nohprah 24 : Ki Pulit ka Tripura kila pynlong ia ka jingtohkit kaba jur bha pyrshah ia u kurim jong ka MLA ka BJP namar ka jingbyrngem pyniap ia uwei u samla uba ring video ia ka Iew ba dang shu shna thymmai.
Kat kum ka jingong ki Pulit, ka jingtohkit ka long kat kum ka ejahar bala mudui da PR Bari PoliceStation ka Belonia, kaba long pyrshah ia u kurim ka MLA ka BJP na Rajnagar ka Swapna Majumdar.
“Ha ka 16 tarik Nohprah, u nongmudui ba kyrteng u Suresh Chandra Dey ula shah bat ha u kurim jong ka MLA u Asim Majumdar katba u dang ring video na ka mobile phone ia ka iew ba dang shna thymmai” ong ki Heh Pulit.
La ong ba u Dey ula shah maham ba um dei ban ring video lem kumta ka jingim jong u ka don hapdeng ka jingma.
U Dey ula kynnoh ruh ba ki runar jong ka Seng ba don ha ka Liang Pyrshah bala ialam da u Majumdar, kila bam klop ia bun bah ka pisa kaba la mang ban pyntrei ia kane ka project kam pynroi.
Kat kum ka jingong ki Pulit, mar syn ioh pdiang ia ka jingujor, mar mar ki register ia ka ejahar bad ka jingtohkit kala iaid shakhmat.
