Agartala, Iaiong 26 :Ha kawei na ki jingjia kaba la pynkyndit bad kaba pynmih ia ka jingsngew iapher niam, uwei u YouTuber na Tripura, u Bapan Nandi la kynnoh ba u la shah thombor ha ki paidbah namar ka jingpyndonkam ia ki model kiba dei ki Hindu na ka bynta ka ‘Eid music video.’
Une u YouTuber uba dei na Udaipur ka Tripura u la shah thombor bad shah pynlehrain ha ka kynhun ki katto katne ki nongshong shnong kiba la kynnoh ia u balei ba ula pyndonkam da ki kynthei Hindu ban shim ia ka bynta kum ki kynthei muslim hapoh kane ka music video.
Kane ka jingjia shah thombor ka la saphriang ruh lyngba ki rynsan social media.Na ka liang ki nong pyndonkam You Tube ka Tripura kila wan shakhmat ban aijingkyrshan ia u Bapan Nandi, ha kaba kila pynrem jur ruh halor kane ka jingshah thombor.
Hynrei, watla katta ka la don ka jingujor pynjah pyrshah ia u nandi halor ka jingkynnoh pynjah burom ia ki nongshong shnong kiba dei ki Hindi da ka Vishwa Hindu Parishad.
Watla katta na ka liang u Nandi u la kam ba um shym la dei u nongpynmih ne producer jong kane ka video, hynrei u dei tang u artist, kata kumba long kine kiwei pat ki model kiba iashim bynta lang.U la ong ba ia kane ka video la thep ha ka channel ka jong u shi sngi hadien ba la pyllait ha ka You Tube u paralok jong u kaba kyrteng Siddik’s YouTube channel.
Na ka liang ki bor pulit haba kren halor kane ka mat ki la pynpaw lyngba ki lad pathai khubor ba ki la rejistar case halor ka nongrim jong ka jingujor pyrshah da ka seng Vishwa Hindu Parishad pyrshah ia u Nandi.U Nandi u la shah khot hajir ha ki pulit mynta ka sngi Balang ha kaba iadei ba kane ka phang.
Na ka liang ki samla kynthei kiba la iashim bynta ha katei ka video ruh ki la pynshai ba kila leh ia kane da la ka jong ka mon sngewbha bad ba ka dei ka kam ka jong ki.
