Agartala, Naitung 11 : Ki Pulit ka Tripura kila kem ia palat 60 ngut ki dkhot ka National Students’ Union of India (NSUI) namar ka jingpyrshang ban khang lynti ia ka kynhun ki kali ba shong u Myntri Rangbah ka Jylla Manik Saha ha Agartala ha ka sngi Balang.
Ki dkhot ka NSUI kila pynlong ia ka jingiakhih ban pyrshah ia ka rai jong ka Sorkar Tripura ban khangdam noh ia palat 300 tylli ki skul namar ka jingduna palat jong ki khynnah skul.
“Ngi wan hangne ban pynpaw ia ka jingpyrshah ia ka rai u Myntri ka tnad Pule Puthi ha kaban khang dam ia palat 300 tylli ki skul Sorkar ha Tripura. Ngi la pynlong ia ka jingiakhih ba jai jai hynrei ki dkhot jong ngi, kila shah patan jubor ha ki Pulit bad shah set. Ngin iai bteng ia ka jingiakhih pyrshah ia ka jingleh bymhok bad ngin leh katba lah ban iada ia ki jaka pule hapoh ka Jylla” ong u Amir Hossain, Nongialamka NSUI.
Ula pyntip ba palat 1000 tylli ki skul kila shah khang dam ha Tripura naduh ba ka BJP kala wan ha ka bor ha u snem 2018 bad ki khynnah skul ba wan na ki iing kiba duh, kila shah pynduh ia ka hok ban ioh ia ka jingnang jingstad.
Ka NSUI kala kynnoh ba da ki spah ngut ki khynnah skul na kylleng ka Jylla kila wan ban iasnohkti lang ha kane ka jingiakhih ba jai jai hashuwa ba kin shah rah bad shah set ha ki Pulit.
Ia kine ki dkhot la kit sha ka jaka set ki Pulit ha kylleng ki jaka.
“Ngi la set ia palat 60 ngut ki dkhot ka NSUI namar ka jingpakhang ia ka surok kaba leit sha ka Iingsah u Myntri Rangbah ka Jylla. Kila pakhang lynti ia kane ka surok la jan shikynta eiei bad kila pynthut ia ka leit ka wan ki kali. Ki khlem shim satia ia kano kano ka jingbit” ong u Chiranjit Chakraborty, Addl Superintendent of Police ka West District.
Dang shen, kum kane kajuh ka jingiakhih la pynlong da ka Students’ Federation of India (SFI) ha Agartala.
