Agartala, Naiwieng 26 :U nongialam ba halor ka seng Congress u Asish Kumar Saha hynnin ka sngi Thohdieng ula ong ba haduh palat 20 ngut ki nongtrei jong ka seng kila ngat ha ka jingshah thombor ha ki kynhun runar ba la kyrshan da ka BJP ha ki laitylli ki jaka ha Tripura, kata ha ka por ba ki dang pynlong ia ka jingiaid paidbah ne ka ‘Bharat Jodo Tripura Bachao yatra’.
Hadien jong kane ka jingjia na ka liang ki nongialam ka Congress kila leit ban iakynduh ia u Director General of Police, u Amitabh Ranjan ban pyntip ha u ha kaba iadei bad kine ki jingjia kiba la wan jia ruh wat hadien ka jingiadon lang ki bor pulit, kata watla kila ioh jingbit ban pynlong ia kane ka jingiaid paidbah.
Haba kren halor kane ka phang, u Saha ula ong; “Mynta ka dei ka sngi kaba hynniew jong ka jingiaid paidbah kaba la bteng ha baroh ki bynta jong ka jylla.Bad mynta ia kane ka jingiaid paidbah la pynlong ha ki lai jaka, kata hapoh Surjyamani Nagar ha West District, Santirbazar ha South district, bad ha Golaghati hapoh Sepahijala district.Ka long kaba sngew kyndit namar wat hadien ba ngi la ioh ia ka jingbit ban pynlong ia kine ki jingiaid paidbah hynrei ki kynhun runar ba la kyrshan da ka BJP kila pynlong ki jingthombor pyrshah ia ki nongtrei jong ngi.”
“Ngi la ioh ia ka jingbit na ka bynta kane ka jingiaid paidbah.Na ka liang ka tnat kam pohiing kala hukum ia ki SP jong ki district ha kaba iadei bad kine ki rally jong ngi.Ngam tip shano kata ka tnat kam pohiing ka don mynta.Hakhmat jong ki bor pulit, ki kynhun runar ba la kyrshan da ka BJP kila pynlong ka jingthombor pyrshah ia ki nongtrei ki jong ngi, ki kali kila shah pynjulor naphang kaba la pynlong ia ngi ba ngin leit ban iakynduh ia u DGP,” ong u Saha.
U Saha ula kam ruh ba ha Santirbazar haduh palat 15 ngut ki nongtrei ka party kila ngat ha ka jingshah thombor, katba ha Surjyamani Nagar kumba san ngut ki nongtrei kila shah thombor bad ki dang don katto katne ki nongtrei ka party kiba la jah rngai hadien ba kila ngat ha ka jingshah thombor ha ki runar ka BJP.
Ha kawei pat ka liang, u MLA uba dei ruh u myntri barim u Sudip Roy Barman ula kam ba kine ki kam thombor jong ka sorkar synshar ka pyni ia ka dak jong ka jingsyier hadien ba kane ka party synshar kala sdang ban duh ia ka jingkyrshan na ki paidbah.
“Ka party synshar kala sngewthuh ba ka Congress kala sdang ban ioh ia ka jingkyrshan na kiba bun ki paidbah ha ka jylla lyngba ka jingiaid paidbah.Kumta ruh halor kane, ka BJP kala don hapdeng ka jingklumar jingmut.Kila sdang ban duh jingkyrshan, bad kaei kaba ki don kalong tang ka pisa bad ki kynhun runar?Shwa katei ka jingiaid rally, ngi la dep ban pan jingbit na ki pulit bad kine ki jingjia ruh kila wan jia ha ka jingiadon lang ki bor pulit kaba pyni ba kim donbor ei ei ruh.Ki runar ka BJP kila byrthen ruh ia ki nongtrei jong ngi da ki pistol.Kila ther maw ia ki kali jong ki nongialam ka congress.Kane kala long kum ka jingsynshar jong ki kynhun runar,” ong u Roy Barman.
Ha kajuh ka por u Barman ula kynthoh tyngeh ia u Myntri Rangbah (CM) ka jylla u Dr Manik Saha uba ha ka jingkren ka jong u, ula kam ba kim shym la don satia kino kino ki kam iaumsnam namar ki kam sain hima hapoh Tripura hadien ba ka BJP kala thaw ia ka sorkar.
