Agartala, Risaw 10: U Myntri Rangbah ka Tripura Manik Saha hynne ka sngi Palei, ula pyntip ba ka Sorkar kala mynjur ban bei haduh T.30 klur sha ka TTAADC ba kan pyntreikam ia ki hynriew tylli ki projek pynroi kiba kongsan ha ki jaka riewlum jong ka Jylla.
Ki bor synshar jong ka TTAADC, kaba la synshar da ka kynhun synroplang jong ka BJP, ka Tipra Motha Party (TMP), ka la dawa ha ki bun bnai ba la dep, ban mang pisa ban pyntreikam ïa ki kam pynroi bapher bapher, na ka bynta ki riewlum, kiba long shi bynta na ka lai bynta jong ka jingbun briew jong ka Tripura, kaba kot shaka 4 million ngut.
Haka Twitter (X), u Myntri Rangbah ka Tripura u Manik Saha u la ong, “Ka Kynhun Myntri ka Jylla ka la mynjur T.30 klur tyngka sha ka Tripura Tribal Areas Autonomous District Council (TTAADC) na ka bynta ban pyntreikam ïa ki hynriew tylli ki kam pynroi kiba kongsan.”
“Ka Sorkar ka kut jingmut ban pynurlong iaki jingangnud ban kyntiew ïa ki jingtei, ki lad kamai, ka pule puthi, ka koit ka khiah, bad ka jinglong jingman baroh kawei na ka bynta ki jaitbynriew Janajati ha ki jaka ba don hapoh ka Sixth Schedule,” la ong u Saha.
Ki 6 tylli ki projek ki kynthup ïa ka jingpynheh ïa kawei ka jaka ïalehkai paidbah bad ka jingpyntreikam ïa ka Mobile Medical Unit (T.10 klur), ka jingshna ïa ka Auditorium (T.10.30 klur) bad ka jingshna ïa ka Mini Stadium kaba don ka Grandstand ha ki jaka jong ka TTAADC.
U Debbarma haka Twitter (X) u la ong “Hadien ka jingsoi ia ka jingiateh Tiprasa Accord ha ka 4 tarik Lber la mang pisa nyngkong eh sha ka TTAADC. Nga sngewnguh ba u Myntri Rangbah u la sngap ïa ki katto katne ki jingdawa jong ngi bad u la shim ïa kane ka rai.”
