Agartala, Nailar 4: Ka jinglong jingman ha Bishalghar Sub-Division kaba don ha khappud ka Sepahijala District, Tripura, kala shongsyier ha ka sngi Thohdieng hadien ba ki samla pule jong ka jaidbyriew ritpaid na ka skul Karaimura, kila shah thombor da ki briew ba nabar namar ka jingphong hijab.
Kane ka jingjia kala wan jia hadien ba ki samla pule kila pynlong ia ka jingiakhih pyrshah ia ka kynhun kaba khang iaki kynthei muslim ba phong hijab ba kin rung sha skul.
Kane ka jingjia kala pynbitar ia ki trai shnong, kaba pynlong ia ki ban khang dam ia ka surok kum ka jingpyrshah. Kila kynnoh ba kawei ka samla pule bala tip kyrteng kum ka Illyas,ba pule klas X, kala shah patan shabar ka skul bad shah shoh ha phyllaw ka iingskul ha kaba ki nonghikai kynthup u headmaster kila shu peitkai bad khlem leh eiei satia.
Halor kane ka jingjia, u Priyatosh Nandi, Headmaster ka skul Karaimura ula pyntip ba shitaiew shuwa kane, ka kynhun ki samla pule barim kiba don jingiadei bad ka Vishwa Hindu Parishad (VHP) kila wan iakynduh ia u. Kila pynpaw ia ka jing sngewkhia halor ka jingailad ia ki kynthei muslim ba kin phong hijab hapoh skul bad kyrpad ia u ban khang pyrshah ia kane da kaba kdew ba kam long satia kat kum ki kyndon bala buh da ka Sorkar haba iadei bad ki jain skul.
U iathuh ba ula dep kren ia ki samla pule ba kin ym phong hijab shuh haba wan sah skul,ula pynpaw pat ia ka jingartatien ban ai ka jingbthah kaba shai namar ba kam don satia kano kano ka jingbthah kaba wan n aka Tnad Sorkar ba khang ia ka jingphong hijab hapoh skul.
Kumba long mynta, ka jinglong jingman kala shongsyier bha ha kane ka jaka, kaba la pynlong ia ki bor Sorkar ban pynkhlain bha ia ka bor pahara kum ka sienjam ban tehlakam ia kano kano ka huri hura.
