Agartala, Rymphang 06: U kyrtong kaTrinamool Congress u Pujan Biswas ha ka janmiet jong ka 5 tarik mynta u bnai u la lait thaw da ka said na ka jingshah thombor kaba triem hapoh 7-Ramanagar Assembly constituency kaba dei ka ktem jong u MLA ka BJP u Surajit Datta.
Haba kren sha ki lad pathai khubor, u Pujan uban ia aireng na 7-Ramanagar Assembly Constituency na ka seng Trinamool Congress u la ong ba kat nang jan sha ka jingiathep vote, kumta ruh kum u kyrtong ula leit ban rung sha ki thliew iingbriew man la ka sngi hapoh kane ka constituency.
“Ha ka sngi sngi U Blei ruh Nga la leit ban rung sha ki thliew iingbriew hynrei ha ka por janmiet hadien ba Nga la leit sha Border Gol Chakkar na ka bynta ki kam ialap ilekshon, ka kynhun runar ba la kyrshan da ka BJP kiba don kumba 70 ngut kila behthong bad byrthen ban pyniap ia nga.Nalor kata ki la ther ruh da ki maw bad pyndonkam da ki ktien bymman pyrshah ia nga.Nga ithuh ia ki baroh bad Nga la leit ban ujor sha ki pulit bad ruh sha ka tnat ka Election commission da kaba jer ia ki kyrteng jong ki”, ong u Pujan.
Nalor kata u la ong ruh ba kane ka kam thombor pyrshah ia u ka pyni kumno ba ka BJP ka don ka jingsyier pyrshah ia ka TMC namar ka party BJP ka la hiar arsut.
Katba na ka liang u president ka Trinamool Congress ka jylla u Pijjush Kanti Biswas u la ong ba u Pujan ula ju ngat teng ha ka jingshah thombor ha ki khyndiat por kiba la dep namar u la ioh pdiang ia ka jingkyrshan jong ki paidbah. Nalor kata u la ong ruh ba u Pujan u la ngat ruh ha ka jingshah byrthen pyniap.
