Agartala, Naitung 10: Palat kumba 100 tylli ki long iing kila kylla phetwir bad khlem iing khlem sem, hadien ka jingshlei um ba kynsan kynsan kala wan jia ha South Tripura district ha ka sngi Balang.
Ka jingia bteng ban ther jong u slap ba khlem sangeh kala pynlong ia ki thain ba long madan ha kylleng ki district, baroh ki skul bad ki anganwadi centres la khang noh shwa tang namar kane ka jingther palat jong u slap.
Ka jingkiew jong ka um ha ka wah Muhuri River kala kiew haduh u dak don jingma ba la kot haduh 15.70 metres, kaba la wanrah ia ka jingshlei um ha baroh ar liang.
Na ka liang ki bor pyniaid district kila kyntu ia ki paidbah nong shong shnong ba kin long kiba husiar hadien ka jingshlei um kaba la jia na ka daw jong ka u slap ba khlem sangeh naduh ka sngi ba-ar.
Kila don kumba 289 ngut ki briew na ki 118 tylli ki longing kila hap ban leit rieh tngeh shipor ha ki 10 tylli ki relief camps.
“Namar ka jingbym sangeh jong ka jingther u slap naduh ka miet sngi Nyngkong, shibun tylli ki jaka ba madan bad them kiba hap hapoh ka Belonia bad Santirbazar subdivisions bun kila shah tap ha ka umsaw bad na ka liang ki bor pyniaid district baroh kila shim lut ia ki lad jingiada,” ong u wei u heh sorkar.
Na ka liang u Myntri Rangbah jong ka jylla Tripura u Manik Saha u la kylli bad pyrthew bniah ha kaba iadei bad ka jingshlei um ba dang shen ha katei ka district bad u la bthah ruh ia ki ophisar ba kin shim ïa ki lad ki lynti ban ïarap ïa kito kiba shah ktah.
Ka tnad India Meteorological Department (IMD) kala pynmih ruh iaka jingmaham ‘orange alert’ ba dei ban long kiba la pynkhreh na ka bynta ka South Tripura district.
