Agartala, Nailur 3 : Ki Pulit ka Tripura kila ioh ban kurup ia u heroin ba shongdor haduh T. 10 klur na kawei ka kali ha khappud ka Tripura-Mizoram hynnin ka sngi saitjain, ong ki Heh Pulit.
Ki Pulit kila ioh kem ruh ia uwei u nongkhaii drok na Assam ha ryngkat bad une u droks.
U Bhanupada Chakraborty, Superintendent of Police, North Tripura district, uba la poi hi ha katei ka jaka,ula ongba ha ka por ba talasi kali ha Damchera kaba don ha khappud ka Tripura-Mizoram, ki Pulit kila ioh ban kurup haduh 100 synduk sabon u droks.
U pyntip ba une u droks u khia haduh 1 kilo 300 gram bad u shongdor haduh T. 10 klur ha ka dor iew.
Une u SP u pyntip ba u Khalil Uddin jong ka Patharkandi kaba hap hapoh Karimganj District, Assam, ula shah kem bad ia ka bolero lem bad u droks la kurup noh da ki pulit bad pynngat hapoh ka NDPS Act ha Damchera Police Station.
