Agartala, Iaiong 30: Ha ka jingjia kaba la pynher syrngiew ia ki nongshong shnong, uwei u briew la kynnoh ba u la khrai khlieh ia la ka jong ka kurim hashwa ban leit bret shapoh kawei ka lyngkha ha Ariala.
Ki bor pulit ki la lapdien ia ki lyngkhot met na ka pyntha ha Ariala kaba hap hapoh East Agartala police station ha Tripura ha kane ka janmiet sngi Thohdieng ba la lah.
Katkum ki pulit, naduh ka janmiet jong ka 28 tarik Iaiong ba la dep baroh kitei ki arngut shikurim, kata u Kayer Miah 25 snem rta bad ka kurim jong u ka Tanuja Begum 15 snem rta ki la jah rngai noh na la ka jong ka iingsah kaba don ha ka thain Para kaba bun ki nongshong shnong kiba dei ki Muslim ha Aralia.
Na ka liang ki trai shnong ki la pyntip sha kiba haiing hasem jong ka Tanuja Begum, hadien ba ki la wan poi ki pata marjan ki la leit rung ha ka iingsah jong ki bad lapdien ia kiba bun ki dien snam.
Mardor na ka liang kiba haiing ki la pyntip noh sha ki pulit, bad ka kynhun ki pulit hapoh ka jingialam jong u SDPO (Sadar) u Ashish Dasgupta ki la wan poi mardor sha katei ka jaka.
Ki bor pulit ki la wanlam da ka kynhun forensic ha ryngkat ki ksew sma dien bad sdang ban pynlong ka jingwad ia ka metiap jong katei ka khynnah kaba jah rngai. Ka kynhun ki pulit ki la lapdien ia buntylli ki jain ki nep kiba la khah snam ia kiba la ieh hapoh painkhana.
Haba kren sha ki lad pathai khubor, na ka liang u SP (West) u Kiran Reddy u la ong, “Tang hapoh sawkynta ba la ioh pdiang ia ka jingujor, ki bor pulit hapoh ka jingialam u SDPO (Sadar) ki la ioh ban kem noh ia u suba donkti uba dei u kurim jong kane ka lanot u Kayer Miah na ki bynta jong ka Battala. Hadien ka jingphla jong une u kurim, ki pulit ki la sdang ia ka jingwad ia ka met ha ki bynta jong ka wah Howrah ha ki bynta jong ka Battala hynrei kim shym la lapdien satia ia katei ka metiap.
Hynrei, hadien ka jingtohkit kaba bniah, utei u kurim una donkti u la phla ba ha ka miet sngi Palei ba la lah u la pyniap noh ia la ka jong ka kurim da kaba khrai khlieh bad thep ia ka metiap ha ki artylli ki pla bad leit bret shapoh kawei ka pyntha hajan ka iingsah ka jong u.
Na ka liang u SP ula ong ba ki la lapdien ia ka metiap ba la ot ar lyngkhot jong kane ka longkmie “Hadien ka jingtohkit ngin sa lah ban tip ia ka daw kaba la pynlong ia une u briew ba u leh ia kane ka kam pyntriem, bad nhi suba ba ki lah ban don ki paralok kiba donkti ha kane ka kam pyniap ba sngewtriem, ” u la ong shuh shuh.U la ong ruh ba ia ka metiap la pynkynriah sha GB hospital ban leh ia ka autopsy.
