Agartala, Jylliew 22 : Ki Pulit ka Amatali Police Station, Agartala, ha ka sngi Balang, kila ioh ban kem ia arngut ki briew kynthup uwei u nong Iran bad uwei u nong Bangladesh na ka iew Aswani kaba don hajan ka khappud Bangladesh.
U Sub Inspector ka Amtali Police Station Pintu Biswas ula iathuh ba halor ka jingioh khubor syntiat ba ki don arngut ki riew phyla ha Iew Aswani, ula phah mar mar ia ka kynhun Pulit bad ha ka jingtohkit ia kine ki briew la lap ba uwei u dei u nong Bangladesh bad uwei u dei u nong Iran.
Ula bynrap ba kine ki arngut kim don satia ia ki kot ki sla ban wan sha India bad kumta la wan kit noh ia ki sha Police Station ban pynlong ia ka jingtohkit. Ki Pulit kila ioh ruh ban kurup ia ki mobile phone na kine ki briew.
U pyntip ba la suba jur ruh ba kine ki arngut ki lah ban don ka jingiadei bad ki lehnoh na Pakistan namar ka jingshem ha ki mobile phone jong ki, ia ki dur jong ka ktem lehnoh ha Pakistan.
Kine ki arngut ki kyrteng u Yukub Yazdanbakhsh uba dei u nong Iran bad u Shahin Mondal na Bangladesh. Ki pulit kila ujor ejahar pyrshah ia ki bad un sa ialam ia ki mynta sha sngi sha Iingkashari ban tian bishar.
Haba kylli, ki Pulit kila pyntip ba ka jingtohkit mynta kala iaid shakhmat halor kine ki dur jong ki lehnoh Pakistan.
Pule ruh: Twa ka khyndew ha ka PA Sangma Stadium na jingther u slap
