Agartala, K’lyngkot 30 :U Myntri Rangbah (CM) ka Assam u Dr Himanta Biswa Sarma hynne ka sngi u la ong ba ha kane ka ilekshon assembly 2023 ka BJP kan jop kham bun shuh shuh ki seat haba ia nujor bad ka ilekshon kaba la long ha u 2018 ha Tripura.
U Dr Sarma u la wan poi ha Agartala ban iashim bynta ha ka rally leit thep kyrteng na ka bynta u CM ka Tripura u Dr Manik Saha.
Hadien ba la pyndep ia ka jingleh niam hapoh Durga Bari temple ha Agartala, u Dr Sarma u la ong, “Ha kane ka lynti kaba mynta ha Tripura ka BJP kan jop shuh shuh kham bun ki seat haba ia nujor bad ka ilekshon assembly 2018.Ha u 2018 ka jingsyier ka dang iai don hynrei mynta ka jingsuk ka la synshar.Kumta ruh khnang ban pynneh ia kane ka jingsuk bad ban kyntiew ia ka roi ka par hapoh Tripura ki paidbah kin kyrshan ia ka BJP, bad katkum ki jingtip kiba ngala ioh ka jingmih na kane kan kham bha shuh shuh haba ia nujor bad ka ilekshon kaba la long ha u 2018.
Haba kylli ia u halor ka jingiateh hapdeng ka CPI(M) bad ka Congress, u CM ka Assam u la shim ia kane ka jingiatreilang ka jong ki kum u nod (zero) bad ong ba ka Congress bad ka CPI(M) ki long nod ha baroh kawei ka ri.
“Kane ka jingiasynrop lang kam dei ka mat kaba khraw na ka bynta jong ki.Ka Congress ka dei u nod uba heh ha ka ri baroh kawei, katba ka CPIM ka dei sa kawei u nod uba heh ha ka pyrthei baroh kawei, bad lada phin khein lang ia baroh ki jingmih kin long nod,” ong u Sarma sha ki lad pathai khubor.
Da kaba pynthikna ba ka BJP sa shisien pat kan thaw ia ka sorkar ha Tripura, utei u nongialam ka BJP u la ong; “Na ka bynta ka jingiatylli, ka roi ka par bad ka jingpynioh ia ki hok ha Triura ngi la shim ia ka rai ban iakhun ia kane ka ilekshon tang marwei hi, hynrei ka IPFT barabor ka iai don ryngkat bad ngi bad mynta ka kynti ruh ki ia don ryngkat lang bad ngi.Hynrei, kam don kano kano ka jingartatien bad tang ka BJP kan thaw ia ka orkar ha Tripura.”
