Agartala, K’lyngkot 11 :U Myntri khynnah ka sorkar pdeng u Kiren Rijiju uba la don ha Tripura ban iashim bynta ha ka jingialang ‘Jana Viswas Yatra’ ula kynthoh tyngeh ia ka sorkar UPA barim ba la lamkhmat da ka Congress halor ka jingbym shim khia bad ka jinglehklet bad leh bym suitniew ha kaba iadei bad ka thain shatei lammihngi (Northeast) jong ka ri.
“Nga la wan jngoh ia ka Tripura ha ka snem 1988 ha ka por ba Nga dang pule ha ka klas 12 na ka bynta ban iashim bynta ha ki jingialehkai sport, bad Nga sngewkmen shibun hadien ba nga la iakynduh bad ki trai shnong.Hynrei, ki kam pynroi ha Tripura ki duna shibun ha ka por jong ka jingsynshar da ka sorkar Congress bad CPI-M.Hynrei ki nongshong shnong ka Tripura ki dei kiba bha shibun.Nga la ia don bynta ha ki kam sain hima naduh ka rta kaba dang kham khynnah.Ha katei ka por hapoh Northeast ka sorkar Congress ka la synshar, katba ia ka Tripura la synshar da ka CPI (M) ha kiba bun ki samoi.Ka BJP kam shym la don satia.Ngi la trei borbah bad mynta ha ka thain Northeast baroh kawei ka BJP kala thaw ia ka sorkar tang marwei bad khyndiat eh ka jingiatehlok,” ong u Rijuju.
Nalor kata u Rijiju ula kam ruh ba hashwa jong ka snem 2018 ka jinglong jingman ha Tripura kam long satia kaba biang, hynrei ha kine ki san snem kiba la leit noh ka BJP ka la lah ban wanrah ka jingkylla kaba khraw hapoh kane ka jylla.
“Ha ki snem kiba la leit noh ka jingdon jong ki dkhot ka Parliament na ka thain Northeast ka duna shibun.Haba ka sorkar congress ka synshar ia ka ri kala ong ba kan ym pyniohnong ne ban shimkhia bad khein kongsan ia ka thain Northeast.Ki Myntri Rangbahduh (PM) ruh ki wan jngoh tang khyndiat eh sha kane ka thain NE.Ngi la dawa na ka bynta ban pynleit jingmut ia kane ka thain Northeast, hynrei ym shym la don iwei ruh na ki PM ka Congress ki ban kheinsnep ia kane ka thain.Namar ka jingtrei shitom ka jong ngi, ka BJP mynta ka la don ha baroh ki jaka hapoh NE, bad hapoh ka jingialam jong u PM Modi kane ka thain mynta kala kiew shaphrang haba ia nujor bad kiwei pat ki jylla jong ka ri ha ka liang ki kam pynroi.U PM Modi ula pynbna ba ki kam pynroi ha India kin ym lah ban urlong khlem da kyntiew ia ka thain Northeast,” ong utei u myntri ka sorkar pdeng.
Shuh shuh u Rijiju u la ong ruh ba ka Tripura kam don hapdeng ka jingshngain ha kine ki phew snem kiba la leit noh, hynrei ha kine ki san snem kiba la leit noh ka la sakhi ia ka shongsuk shongsain bad ka jylla kala lait na ki kam pyntriem kiba bun rukom.
