Agartala, Lber 7: Ka Seng sain pyrthei ba bun paid eh ka Liang Pyrshah ha Tripura, Tipra Motha Party, kaba la pynduh thiah duh dem ia ka Sorkar BJP da ki jingiakhih ba khlem sangeh la palat shisnem, ka la leit ban kyrshan ia ka BJP bad rung lang ialade ha ka Sorkar.
U Nongialam ka Liang Pyrshah ha Iingdorbar ka Tripura bad Nongialam ka Tipra Motha Animesh Debbarma ha ka sngi Palei, ula bam smai kum u Myntri Sorkar katba uwei pat u MLA ka party Biswakety Debbarma ula shah thung kum u Myntri Khynnah.
Ka rai ban leit iasnohkti lang bad ka BJP-ka party kaba ka iakhun bha ban ioh jaka ha Tripura, kala wan jia hadien ka jingiasoi ia ka soskular ba lai liang manla hapdeng ka Sorkar Jylla, ka Sorkar Pdeng bad ka Tipra Motha ba long ha ka taiew bala lah.
Ka Tipra Motha Party ka dei kaba la pynmih da u Pradyot Manikya Debburman, u khun syiem ka Tripura, ban iakhun ia ka hok jong ki paid riewlum jong ka Jylla.
Kala mih nyngkong eh ban iakhun ia ka elekshon ha ka elekshon MLA ba long ha u snem bala lah. Ka Tipra Motha kala pynieng 42 ngut ki kyrtong ba kynthup ia 20 ngut na ki constituency bala bhah tang sha ki riewlum. Kane ka party kala jop haduh 13 seat bad ioh haduh 19.69% ka jingioh vote.
Ka jingmih noh jong ka Tipra Motha na ka Liang Pyrshah kala nang pynjakhom ia ka kynhun Liang Pyrshah hapoh ka Iingdorbar.
Mynta ki party kiba don ha ka kynhun synrop jong ka Liang Pyrshah ki dei ka Congress bad ka CPI-M.
