Agartala, K’Lyngkot 11: U Myntri Rangbah ka Tripura Manik Saha ha ka sngi Saitjain u la pynlong ka jingialang bad ki heh ophisar jong ki shipai ka Indian Army, halor ki jingeh kiba iadei bad u pud u sam jong ka India bad Bangladesh bad ki jingeh kiba dang mih ha ka liang ka jingshngain.
Kane ka jingiakren ki long kiba kongsan namar ba ka wan ha shwa ka elekshon ban wan ha ka Ri ba marjan jong ka Bangladesh.
Ha kane ka jingialang la wan ban ia don lang u General Officer Commanding (GOC) jong ka Red Shield Division, u Major General Shubankar Basu, ryngkat bad kiwei pat ki ophisar ba rangbah.
Ha ka jingiakren ki la pynleit jingmut ha ki jingjia ba dang shen ha khappud India bad Bangladesh, ki jingsngewkhia halor ki jaka ba don ki thliew, ki kam sniew kiba lah ban mih, bad ki jingktah ia ka jingshngain na ka elekshon jong ka Bangladesh kaba la buh ban long ha u bnai ban wan.
U Major General Basu u la sam ïa ka jingkhein ka jong u ïa ka jinglong jingman bad pynthikna ba kan bteng ban peitngor bad ka jingïatreilang kaba jan.U la pynpaw ruh ïa ka jingsngewnguh ïa ka jingkyrshan ba man ka por ba la ai da ka sorkar Tripura ïa ki shipai India.
U GOC u la ong ba yn pyrshang ban pynkhlain shuh shuh ia ka jingiatreilang hapdeng ki riew paidbah bad ki shipai lyngba ka jingpynbha ia ka jingsam jingtip bad ki jingthmu ban leit shabar, kynthup ia ki jinghikai ai mynsiem ha ki jaka pule, ki jingialang ban thung kam, bad ki prokram ai jinghikai ia ka Agniveer prokram.
U Myntri Rangbah ka jylla u Saha u la pynpaw ka sorkar jylla kan ai ka jingkyrshan ba pura bad ka kwah ban ïatreilang bad ki shipai ha baroh ki kam jong ka.
Ki heh ophisar ki la ong ba kane ka jingleit jngoh ka la pynpaw ïa ka jingïadei kaba skhem jong ka Red Shield Division bad ki paidbah ka Tripura bad ka jingshim khia ba khlem artatien jong ka ban ïada ïa ka jinglong ryntih jong ka ri katba ka dang burom ïa ka pateng jong ki riewshlur jong ka ri India.
Kane ka kynhun shipai ka la don ka bynta kaba kongsan ha ka Bangladesh Liberation War ha u snem 1971, kynthup ïa ka thma Gangasagar hajan Agartala, ha kaba ki shipai jong ka ki la pyni ïa ka jingshlur bad ka jingtbit ba kyrpang.
Ka jingïakren ha ka sngi Saitjaiñ ka dei ka jingleit jngoh nyngkong eh jong u Major General Basu sha Agartala hadien ba u la shimti kum u command jong ka division ne u heh jong ka kynhun shipai.
Kum shi bynta jong kane ka jingleit jngoh, u la leh burom ha ka jaka buh sah kynmaw ïa ka thma jong u Albert Ekka War Memorial, bad kiwei kiwei ki shipai kiba la len lade bad aiti kaba khraw na ka bynta ka jingshakri ïa ka ri.
