Agartala, Nohprah 11: Da ki spah ngut ki dkhot ka Hindu Ekta Manch, ki la mih sha ki surok jong ka Kailashahar Unakoti district ka Jylla Tripura, ban dawa ia ka Sorkar Bangladesh ba kan pyllait noh ïa u nongaiktien jong ka ISKCON, u Chinmoy Das.
Kine ki nongiakhih kila pynrem ruh ïa ka jingnang shyrkhei ka jing pynshitom beiñ jong ki riewngeit Hindu ha Bangladesh.
Katei ka jingiaid paidbah ka la sdang na Tri-Junction ha Shrirampur bad kila la iaid lyngba ka Kailashahar.
Ia kane ka jingiaid paidbah la ialam da u nongiasaid ain ba rangbah uba dei ruh u nongialam jong ka niam Hindu u Sandeep Debroy, ha ryngkat ki riew pawkhmat kum u Gautam Das, u Deepak Bhattacharya, u Uttam Deb, u Shyamal Sarkar, u Bijoy Das bad u Ajay Das.
Ban pynthikna ba kan nym mih kano kano ka huri hura, ki bor iada naduh ki Border Security Forece (BSF), Central Reserve Police (CRPF), Tripura State Rifles (TSR) bad ki pulit ka jylla kila pynkhlain bha iaki jingpahara.
Haba ai jingkren sha ki paidbah, u Sandeep Debroy u la kynnoh ïa ka Sorkar shipor jong ka Bangladesh, kaba la ïalam da u Mohammad Yunus, ba ka la set beaiñ ïa u Chinmoy Das.
U Sandeep Debroy u la pynbna ba ki jingiakhih kin dang iai bteng haduh ban da pyllait ia u Chinmoy Das.
U la pynrem ruh ïa ka jingshah lehbeiñ jong ki riewngeit Hindu ha Bangladesh, da kaba kdew ïa ki jingjia ba dang shen jong ka jingthang ding, ka jingshah thombor, bad ka jingpynjah burom ïa ka lama ri India da ki kynhun Fundamentalist ka Ri Bangladesh.
