Agartala, Jylliew 21 : U Myntri Rangbah ka Tripura Manik Saha ula bthah ia ki borkhmih ban wengkam noh ia u Warden bad u caretaker jong ka Hostel hadien ka jingiohpang ki 20 ngut ki Khynnah pule Kynthei hapoh skul hadien ka jingbam jastep ha ka sngi Palei.
Ha kajuh ka por, la phah show cause notice ruh sha ka Maharaja Bir Bikram Welfare Society, kaba pyniaid ia ka Hostel.
Haduh 20 ngut ki Khynnah skul kynthei kila ioh ia ka jingpang suhkpoh ba kynsan kynsan hadien ka jingbam ja hapoh ka hostel ka Maharaja Bir Bikram Welfare Society ha ka sngi Palei ha Agartala.
Kat kum ka jingong ki doktor, ka jinglong jingman jong kine ki samla pule kala kham biang mynta bad mynta ki dang tohkit ban lap ia ka daw jong kane ka jingiakem pang kynsan ki khynnah skul.
Ka jingtohkit ba malu mala ka pynpaw ba ka lah ban dei ka jingngat bih na ka jingbam ba ai hapoh ka hostel.
Baroh kine ki khynnah skul ki dei na ka jaidbynriew riewlum kiba sah ha hostel ha Indranagar, kaba don shabar jong ka Sor.
Haba thoh ha X, u Myntri Rangbah ka Jylla ula ong “Nga la ioh ia ka jingtip halor ka jingjia ia kine ki khynnah skulk a Bodhjung Girls School ba ioh pang bad ka Sorkar Jylla kala shimkhia bha ia kane ka kam”.
“La pynkit mar mar ia ki sha Hospital. Haba nga ioh ia ka jingtip, nga la bthah ia ki doktor ban shim ia baroh ki sienjam kiba donkam. Kane ka jingjia ka lah ban dei na ka jingngat bih na ka bam” ong u Saha.
U CM ula bynrap “Nga la bthah ia ki Heh Ophisar ba kin aiti ia ka kaiphod sha nga halor kane ka kam. Baroh ki khynnah skul kila kham jem mynta bad ym dei ban iakhuslai shuh. Nga la bthah iaki doktor ba kin ai ka jingsumar kaba paka”.
