Agartala, Lber 02 :Ka party synshar Bharatiya Janata Party (BJP) ka la lah ban wanphai biang ha ka bor synshar hadien ba kane ka party ka la jop 32 tylli ki seat na ki 60 tylli ki seat khlem da donkam ia ka jingkyrshan jong ka paralok synrop IPFT ka ba la jop tang shi seat.
Katba ka Left ka la jop 11, ka Congress 3 bad ka Tipra Motha 13 tylli ki seat ha ka jingmih ia aireng ha ka sien kaba nyngkong kum ka party sain hima sima jong ki trai muluk hapoh ka jingialam jong u Pradyot Kishore Manikya Debbarma.
Hadien ba la mih na ka jaka niew vote, u Dr Saha uba la ioh ia ka jingjop napoh 8 Town Bordowali Assembly constituency u la pynpaw ka jingsngewnguh ia u PM Narendra Modi, u Myntri kam pohiing ka sorkar pdeng u Amit Shah bad ia u president ka BJP hapoh ka ri u Jagat Prakash Nadda nalor kiwei pat ki nongialam napoh central bad ki nongialam hapoh ka thain.
Nalor kata u Saha u ai ka jingkhublei ia ki nongtrei jong ka party khamtam ruh ia ki paidbah kiba dang ai ka jingshaniah ha kane ka saffron party. Ha ki sngi ki ban wan, ngi la kut jingmut ban pynleit jingmut halor kawei ka Tripura bad ban khmih halor ki kam pynroi hapoh ka jylla baroh kawei.Ha ka juh ka por u la pyrto halor ka jinglah ban pynlong ia kane ka ilekshon kaba iaid beit iaid ryntih.
