Shillong Nailur 11: U Myntri Sorkar ka Taxation Abu Taher Mondal ha ka sngi Palei, ula ong ba ka tnad GST jong ka jylla kala shimkhia ha kaban tohkit ia ki karkhana thok kiba treikam hapoh ka jylla Meghalaya.
“Nga pynthikna ia ka iingdorbar ba ka tnad GST ka jylla ka dang shimkhia bha ban tohkit ia ki karkhana thok kiba treikam hapoh ka Meghalaya kiba la donkti ha kaban ai ia ka Input Tax Credit (ITC) sha kiwei pat kiba don shabar jong ka jylla bad ia ka jinglap na kitei ki jingtohkit la dep ban pyntip lem sha ki bor sorkar jong kiwei pat ki jylla, khnang ba kan don ka jingiatreilang ha kaban pynshitom pyrshah ia kitei ki karkhana thok kiba donkti bad ban pynshitom ha ka rukom kaba ryntih” la ong u Mondal haba jubab ia ka Zero Hour notice kaba la wanrah da u MLA ka VPP na Nongkrem u Bah Ardent M Basaiawmoit ha iingdorbar thawain, kaba iadei bad ki kaiphod kiba la kynnoh ba T.500 Klur ka GST kala don ka jingleh thok kaba kynthup ia ki karkhana Coke ha Meghalaya.
Ula pyntip ba ka tnad GST kala dep ban phah da ki jingthoh sha ka Directorate General of GST Intelligence (DGGI) ban kyrpad ban aiti ia ki jingtip khnang ba yn lah ban pynshitom ia kitei kiba ioh pdiang thok ia ka Input Tax Credit (ITC) hapoh u pud u sam jong ka jylla.
“Kila don ki jingleh thok kiba la lap da ki kynhun kum ka Directorate General of GST Intelligence (DGGI) ia kaba la pyntip man la ka por sha ki bor sorkar bad haba ngi ioh pdiang ia kum kitei ki jingjia, la shim ia ki sienjam kiba tyngeh kaba iaid ryntih katkum ka aiñ” ula ong.
Ka kaiphod kala kynnoh ba ha ka 20 tarik u Nailar 2025, 4 ngut ki riewshimet kila shah kem halor ka jingai thok ia ka Bill. Kine kiba la shah kem ki kynthup ia u Gaurav Agarwal, Deepak Agarwal, Vinod Agarwal bad u Guddu Singh baroh kine kidei ki nongshong shnong ka jylla Assam. Sa uwei pat udei u Shiv Kumar Mittal u trai jongka GM Coke Plant ha Byrnihat kaba hap hapoh ka jylla Assam ula shah kem halor ka jingkiar ban siew ia ka GST kaba la kot ia ka T.150-200 klur lyngba kitei kijuh ki kam buittuh.
U Mondal ula pyntip ba ka Directorate General of GST Intelligence (DGGI) kam shym la ai ia kino kino ki jingtip sha ka tnad GST ka Meghalaya ha kaba iadei bad ki karkhana Coke kiba don ha Meghalaya la kidei kiba la ioh jingmyntoi na kitei ki kam buittuh.
Ula pynpaw ba ka ka jingpynbiang ia u dewiong hapoh ka jylla Meghalaya kala long ha ka rukom kaba duna naduh ba ka National Green Tribunal (NGT) kala khang pyrshah ne ban ia ki jingtih dewiong thliew khnai (rat-hole mining) ha u snem 2014. Kumta ki karkhana Coke ki shaniah ia u dewiong uba la dep ban die lilam ha ki district ban pyndap ia ka jingdonkam kaba pura ka jongki, kila thied ruh ia u dewiong na shabar jong ka jylla.
Ka Input Tax Credit (ITC) kadei ka bynta kaba kongsan jong ka jingtreikam ka GST, namar ka ailad ia ki nongioh pdiang ban pynduna ia ka Output Tax Liability. U nongioh pdiang u lah ban kam tang ia ka ITC haba ka Invoices kadei kaba la pyntip ha ka GST Returns.
Ha kaba iadei bad ka GST Portal, baroh ki Invoices jong ka jingthied ia u dewiong da ki karkhana Coke ha Meghalaya kidei kiba la pynpaw, ryngkat bad ka jingpyntip lyngba ka ‘e-way bills’ kaba la pynmih ban buh rekod ia ka rukom iaid jong u dewiong shapoh ka jylla.
“Ki jingtynjuh, ka shong eh ha ka jingpynthikna ia ka jinglong shisha jong kitei ki Invoices. Ki ophisar jong ka tnad GST ka jylla kim lah ban khmih bniah ia ka ‘Returns’ jong ki nongsiew khajna kiba la rejistar ha kiwei pat ki jylla. La pynmih thok ia ki Invoices ban ioh ia ka ITC ka bym shisha bad ki lah ban pynshisha ba kidei kiba thok, lada u nongshalan ym dei uba don shisha, lada ki mar ne ka jingshakri kam dei satia kaba la don shisha ka jingshalan, lada ym shim la siew ka khajna kumba la kam lane la siew da kaba leh ne shna thok ia ka ITC” ong u Mondal bad ka bynrap “Ka jingtohkit ia ki nongshalan ne nongkhaii kiba na shabar ka jylla ka hap hapoh jong ka bor jong ka Central GST, khamtam eh ka Directorate General of GST Intelligence (DGGI), kaba don ia ka bor ban leit jurip ia kitei ki jaka treikam kiba don ha kylleng ki jylla”.
Ula pyntip shuh shuh ba katkum ka GST Portal Records, hapdeng u snem 2022-23 bad 2024-25, 29 tylli ki karkhana Coke kila treikam na ki 54 tylli kiba la dep rejistar. Ka jingpynmih ha kitei ki snem ka long T.307.06 Klur bad ka Tax Liability baroh ka long T.18.75 Klur. Ha kaba T.15.84 Klur la dep ban pyllait lyngba ka ITC bad ka dang don ka pisa kaba dang sah. Ha katei ka juh hi ka por, kitei ki karkhana kila thied 1,48,134 MT u dewiong na shabar ka jylla, uba shongdor T.72.49 Klur bad ka IGST kaba T.24.57 Klur.
Ha kaba iadei bad ki jingkynnoh, u Myntri Sorkar ula ong ba ka kaiphod kam shim la kdew satia la ka jingshna thok ia ka ‘Invoice Billing’ kadei kaba iadonbynta bad ka jingdie ia u Coke da ki karkhana ne ka jingthied ia u dewiong kum u mar pohkhyndew. Hynrei, namar ba ki kompani kiba donkti kidei kiba don shabar ka jylla, kumta ka lah ban long ba ka jingleh thok kan shong ha ka jingthied ia u dewiong da ki karkhana Coke kiba don ha ka jylla
