Shillong, Nailur 10 : Ka Ophis u Superintendent of Police ka East Khasi Hills, kala thung ia ka jingtohkit halor ka jingkynnoh pyrshah ia uwei u Pulit Sub Inspector ba u kyntait ban pdiang ia ka ejahar hynnin ka sngi ha Laban Police Station.
La pyntip ba hynnin ka 9 tarik Nailur, kawei ka Kynthei kala leit pyntip sha ki Pulit ka Laban Police Station ba ka shah ktah kti ha uwei u nongniah taxi bad kala buh ruh da ka ejahar hynrei la kynnoh ba uwei u Pulit SI ula kyntait ban pdiang ia kane ka ejahar.
La kynnoh ruh ba une u Pulit SI ula shoh khaw-iang hapdeng ka kam, kaba lam sah ka jingiania kaba jur bad ki bahaiing hasem jong kane ka kynthei ba leit ujor.
Ia kane ka nongujor la iarap noh da kawei ka Pulit kynthei jong ka Women Police Station, kaba la pyn register ia ka case kat kum ka ejahar.
Ka Ophis u SP kala thung mar mar ia ka jingtohkit bala khlieh da u Sector Officer ka Laban Police Station haba pyntip ba u SP ula thung ruh ia ka jingtohkit ka Tnad pyrshah ia une u Ophisar.
Ka Ophis u SP ka kyntu ruh ia ki paidbah ba kin ai jingtip haba don kum kine ki jingjia lane pan jingiarap da kaba phone ha u nombor 112.
Haba iaken bad ki nongthoh khubor, u Superintendent of Police Bah Sylvester Nongtnger, u pyntip ba ia une u Pulit Sub Inspector ka Laban Police Station la wengkam shipor (sospon) bad ka jingtohkit mynta kala iaid shakhmat da u Sector Officer uba dei ruh u SDPO ka Pynursla.
U pyntip ba une u Sub Inspector u kyrteng u Bah Ricky E Marwein.
