Nongstoiñ, Lber 20: Ki Nongialam jong ka Jaidbynriew Nepali ha Assam, kila kyntu ia ki paid Khasi kiba shong ba sah ha ka thain Langpih, ban pynkut noh ia ka jingiasngew iapher Jaidbynriew bad ban “ialong noh kawei hapoh ka Ri”.
Kane ka sur ki nongialam ka Jaidbynriew Nepali kala mih na ka jingiakynduh lang jong ki paid Nepali ba sah ha Assam, kaba la pynlong da ka Kamrup Jilla Gorkha Kalyan Samiti, ha ka taiew bala lah.
Ïa katei ka jingïalang paidbah la pynlong ha kawei shnong kaba ki Khasi ki ju khot ne sin kum ka Lawbah, kaba dei ruh ka jaka ïa kajia khappud hapdeng ka jylla Assam Meghalaya.
Kane ka Shnong ka dei kaba ju sin ne khot ruh kum ka Harsha Nagar da ki Nepali, kaba ka Assam ruh ka ju kam ba ka dang hap hapoh u pud u sam jong ka.
Ha kane ka jingialang la wan ban iashimbynta da u Nilamani Upadhay President ka Gorkha Kalyan Samiti, u Arjun Chettri Rabha Hasong Autonomous Council, u Bikas Chettri President Reception Committee bad u Sambu Chettri Secretary ka Gorkha Kalyan Samiti, u R.G.Momin MLA katei ka thaiñ bad kiwei kiwei, ki la donlang ban ai mynsiem.
Kine ki Nongialam kila ïawer ïa ki paid nongshong shnong ka thaiñ kynthup ia ki Nepali bad ki Khasi ba kin don noh ia ka mynsiem ïatiplem bad ban ïa im kum shi para wat lada don la ki rukom bapher bapher, la ka long ha ka riti dustur ne ha ka mane Blei.
Ha katei ka jingïalang kaba la neh kumba ar sngi la don shibun ki jingpynbyrngia bapher bapher, kynthup naduh ka shad ka rwai, ka put ka tem tynrai bad ka kynhun kum ka dak jong ka jingai mynsiem. Ban pynshlur ïa ki samla pule la ai ruh ïa ki khusnam sha kiba la wan shakhmat ha ki jingpule.
