Shillong, Nailur 25: U Myntri Rangbah ka jylla u Conrad K Sangma ula kyntu ia ka jingdonkam ban shim ia ki lad ki lynti kiba biang ha ka rukom tih ia ki mar poh khyndew kaban lah ban pynneh pynsah bad ban pynduna ia ka jingktah ia ka mariang bad ia ki jingthaw bapher bapher.
Ula kyntu ruh ia ki nongtih mar poh khyndew ba ki dei ban don ia u pud hapdeng ka jingtih ia ki marpoh khyndew bad ban pynneh pynsah iaka mei mariang.
U Conrad ula ong, ba katba dang wad bad tih ia ki marpoh khyndew na ka bynta ban kyntiew ia ka roi ka par jong ka jylla bad ka ri, ka long pat kaba donkam ban pynthikna ha ka ban pynduna ia ka jingktah ia ka mariang bad ia ki sawdong sawkun bad dei ban don ia u lain hangno re hangno.
“Ngi kum kiba don bynta ngim lah ban kyntait ia kitei ki jingshisha bad kaba kongsan bha ka long ban pynthikna ba ka jingpynneh bad ban don ia ka jinglong ryntih kaba iahap mar katjuh”, ula ban jur ia kane haba kren ha ka jingplie ia ka Workshop halor ka mat “Enhancing Mineral Exploration through NMET” kaba la pynlong da ka Directorate of Mineral Resources ka sorkar jylla ha State Convention Centre hynne ka sngi Balang.
Nalor kane ula kdew ruh ba ha ka jingiaid shakhmat jong ka teknoloji ha kine ki sngi kiba mynta, ka jingwad ia ki marpoh khyndew ka la nang long kaba thikna bha, kaba suk bad katkum ka jingstad saian.
“Ki paralok kiba treikam kat kum ka teknoloji kum ka NESAC kila leh ia ka bynta kaba khraw ym tang ha ka kam tih ia ki marpoh khyndew hynrei wat ha kiwei ki bynta kum ka Water Resources bad Forest Resources Mapping” la ong u Conrad.
U Myntri Rangbah ula ong ba ka jingkylla ha ka rukom tih mawshun na ka rukom tih tynrai, kaba ki nongtih marpoh khyndew jong ka jylla kila trei da ki spah snem sha ka rukom tih mawshun da ka jingstad Science ka hap ban don ia ka nongrim.
“Ka jingkhang ia ka rukom tih marpoh khyndew ka bym iaid katkum ka jingstad Science ka ktah jur ia ka ioh ka kot jong ki longiing kiba shaniah tylli na ka kam tih marpoh khyndew bad ia ka ioh ka kot jong ka jylla, kumta ka jingkylla ka hap ban long kaba iahap bad baroh bad ka jingkylla ka jia hapoh ka por kaba la buh,” ula ong.
U Myntri Rangbah ula pyllait paidbah ruh ïa ka State Geological and Mineral Map of Meghalaya on 1:1 million scale bad ula pyllait paidbah ruh ïa ka Meghalaya Minerals Database ha kane ka jingialang.
Ia kane ka workshop kaba shisngi la pynlong ban pynsted ia ka kam wad bniah ha ka jylla bad lyngba kane ka workshop, baroh kiba donbynta kiba kynthup naduh ki kam wad marpoh khyndew bad ban kyntiew ia ka jingpynmih ia ki marpoh khyndew ha ka jylla.
Ka Workshop ka long ruh ban pynshlur ia ki kynhun shimet ban iashimbynta ha ka kam wad bniah ia ki marpoh khyndew.
La ioh ruh iaka jingkren bad ki jingbatai kiba bniah na ka NESAC, NMET, Ministry of Coal, GSI, Law Department, SEAC, CMPDI bad MECL.
