SHILLONG, Lber 21: Ki pulit ka jylla ki dang wad ia baroh ki lad ki lynti ban lap bad ban iohkem ia kawei ka kynthei kaba dung da ka Tari ia uwei u samla rangbah ha Khyndailad dang shen.
U Zecharia Sohthiang, ba shong basah ha Mawtari, Myrdon, Umsning ula shah dung da ka Tarik ha ka 19 tarik u Lber, la iathuh u Superintendent of Police ka East Khasi Hills u Dr MG Raghavendra Kumar, hynne ka sngi.
Ula pyntip ba une u samla rangbah ula iathuh ha u investigation officer (IO) ba ula shah dung da ka tari ha kawei ka kynthei hajan Hotel Pegasus bad ula ong ba u ithuh iaka durkhmat jong katei ka nongdung Tari.
“Kane ka jingjia ka dang ka dang don hapoh ka jingtohkit bad ngi ialeh katba lah ban ban lap bad ban iohkem ia katei ka kynthei kaba la donkti ha kaban dung da ka tari ia une u samla” ong u Dr Kumar.
Ia u Bah Zecharia la rah sha NEIGRIHMS na ka bynta ban ioh iaka jingsumar.
Ka hynmen jong une u samla, ka Kong P Sohthiang kala ujor da ka ejahar bad la rejistar case ia kane ka jingujor ha Sadar Police Station.
U SP ula ong,naduh ka step jong ka 19 tarik, u samla uba la mynsaw ula ai ia ki jingtip ki bym biang bad kiba long artatien, ha kaba iadei bad ka jaka jong ka jingshah dung bad ka por kaba la jia bad shaphang ki briew kiba donkti ha katei ka kam thombor.
Ha ka jingtohkit bniah la shem ba une uba la mynsaw ula bat jubor ia kawei ka kali shimet na Khyndailad na ka surok kaban mih sha Hotel Pegasus haka 18 tarik u Lber ha kapor 9.45 mynmiet bad ula kyrpad na ki 4 ngut ki briew kiba don hapoh jong ka kali ban iarap ban lap iaka Scooty ka jongu kaba ula kam ba ula mad ia ka jingaksiden ha Mawprem.
Haba la poi ha Mawprem, u Bah Zecharia Sohthiang ula phla ia kitei ki nongiarap ba ula shah dung da ka tari bad ula kyrpad ban ialam lem ia u sha ka iing ka ba u shong u sah kaba don ha ka shnong Mawshbuit kaba hap hapoh ka jingkhmih jongka Madanriting Police Station.
Kitei kiba la don hapoh ka kali ryngkat bad uba la mynsaw kila poi ha Mawshbuit ha ka por kumba 12.30 mynstep jong ka 19 tarik u Lber bad kila aiti ia une u samla uba la mynsaw ha ki ar ngut ki bahaiing kiba ula shong la sah lang bad ki.
Ha ka por 3.59 mynstep, iwei na ki bahaiing ila leit pyntip haka EMRI shaphang jkatei ka jingjia bad kyrpad ia ka jingdonkam iaka kali kit nongpang, kumta ia une uba la mynsaw la wan ialam sha Shillong Civil Hospital ha ka por 5.30 mynstep da kitei ki ar ngut ki bahaiing da ka kali kit nongpang jong ka EMRI.
