Shillong, Rymphang 20 : Ka Sorkar Jylla kan sa sdang noh shen ia kawei pat ka kylla ha ka jingthungkam ia kumba 1000 ngut ki nonghikai hadien bala dep pynkhreh bad mynjur ia ka roster.
Haba pyntip ia kane hynne ka sngi Palei, u Director of School Education & Literacy Swapnil Tembe ula ong “Ia mynta, ka roster ka dang don ha ka jingbishar bad hadien bala dep mynjur, ngin sa lah ban pyniaid shakhmat ia ka jingthungkam nonghikai. Kum ha kajuh ka kyrdan, ngi la pynkhreh sa kawei pat ka kylla ban thungkam ia ki nonghikai ha ki kyrdan bapher bapher jong ki skul Sorkar”.
Kat kum ka jingong jong ki, ki don kumba 500 tylli ki kam nonghikai ba lait thylli ha ki skul Lower Primary ka Sorkar, 10-20 tylli ha ki Upper Primary bad 200-300 tylli ha ki secondary. Hynrei, ki don ki kyndon ban thungkam ia ki substitute teacher halor ki kam ba lait ha ki skul secondary ban pynthikna ba ki khynnah skul kin ym shah ktah, ula ong.
Ia kiwei pat ki skul, u Director ula ong ba ka rukom pynshong nongrim ia ki skul ka long kaba kongsan bha ia ka Jylla. “Ngi la leh ia kane ka kam bad hadien ba ngi la pyndep, baroh ki kam kiba lait ngin sa thungkam noh” ula bynrap.
Ha u 2023, ka Sorkar Jylla kala thungkam ia palat 1000 ngut ki nonghikai.
