Thungkam ka Jio World Convention Centre ia 20 ngut ki samla na Meghalaya

Shillong, Nohprah 22: Ha ka jingkyntiew kaba khraw ia ki lad ioh kam ioh jam na ka bynta ki samla ha Meghalaya, ka Jio World Convention Centre (JWCC), Mumbai ka la thungkam ia 20 ngut ki samla daka ba jied iaki naka Campus Recruitment Drive kaba la long ha Shillong.

Iaka Campus Recruitment Drive la pynlong ha ka jingïatreilang bad ka Emporium Skills Training Institute (ESTI) bad ka Don Bosco Youth Center (DBYC), Laitumkhrah bad kane ka dei ka sien kaba nyngkong ba ka JWCC ka la thepkam iaki samla na Meghalaya, kaba pyni ia ka jingsngewtynnad jong ki Company ban wad ia ki riew shemphang na kane ka thaiñ.

Ha kane ka Campus Recruitment Drive, haduh 111 ngut ki samla na kylleng ka jylla kila wan Iashimbynta bad hadien lai sien ka Interview, la jied iaki 20 ngut ki samla bad haka juh ka por la aiti iaki shithi thungkam.

Kane ka long kum bynta jong ka jingpynshlur ïa ki nongïashim bynta khamtam iaki samla kiba wad kam wad kam.

Ia ki samla ba shah thungkam la tyrwa daka tulop kaba bit ha ryngkat ka jaka sah, ka bai leit bai wan ba man ka sngi, ka jingbam ha ka por trei, ka jingsumar na ka bynta jong ki bad ka iing ka sem jong ki, ki tiket liengsuin bad kiwei ki lad jingmyntoi kynthup ka Provident Fund.

La buh por ba kin leit sha ka JWCC ha ka 19 tarik Kyllalyngkot 2026 hadien bala bishar bniah ia ka koit ka khiah.

Kane ka jingshah jied ki samla, ka pyni ia u mawjam jong ka jingtei nongrim ba la buh da ka Don Bosco Youth Centre lyngba ka jingai jinghikai pyntbit, ki jait prokram pynroi ia ki sap, bad ka jingkyrshan ban ioh kam, khamtam eh na ka bynta ki samla kiba duna dkhot met.

Ha kaba sdang jong une u snem, ka DBYC ka la iasoi iaka jingiatreilang jong ka bad ka ESTI lyngba ka jingiateh ban ai jinghikai ba kyrpang ha ka kam aviation, hospitality bad cruise-line services.

U Director u Fr Michael Makri u la batai ia ki jingpynrung kam kum ha kane ka por ka ai mynsiem ia ka imlang sahlang, da kaba ong ba kane ka jingthmu ka pyni kham bun ban ia ka jingkiew ha ka kam. “Kane ka jingpynrung kam kam dei tang shaphang ki kam, ka dei shaphang ka burom, ka jingkyrmen, bad ka lawei jong ki samla jong ngi” u la ong.

Ka Centre ka la ong ba kum kine ki jingïadei ban thung kam iaki samla kin long ha ki bnai ban wan namar ka jingdawa ïa ki nongtrei ba la pyntbit ka dang kiew ha kylleng ka ri India.