Shillong, Jylliew 06: Ka Khasi Students’ Union Mawshynrut Circle hynne ka sngi Palei kala rakhe ia ka sngi pynneh mariang ne ka World Environment Day da kaba thung kumba laispah tylli ki tynrai dieng.
Ha katei ka jingrakhe ia ka sngi pynneh mariang la iashimbynta da ki nongialam bad ki dkhot ka seng, ki Nongialam Shnong bad ki skul bapher bapher kiba don hapoh ka thaiñ.
Ki Nongialam jong ka KSU kila pynpaw, haba ieid iaka jaitbynriew dei ban ieid ruh ia ka mei mariang namar dei lyngba jongka ba ioh ia ka lyer bakhuid bad ki jingdonkam ba man ka sngi bad kumta dei ban sumar ruh ban thung kham bun ki dieng khnang ba kan iada na ka jingkylla sted palat ka mei mariang namar katkum ba long mynta, ka aiom kam biang shuh katkum ki por bad ka jingshit kala nangkiew nangkiew katba nang mih ki sngi bad ka jingkyrduh um kala nang jur wat ha ki thaiñ kyndong ruh.
Kila ong, ba dei tang da kaba thung kham bun ia ki dieng, ban sumar bha ruh khnang ba kin lah ban iada iaka jingshit kyrang ka sngi bad ka jingtyrkhong ki um ki wah bad ka seng ka kyntu ruh ban sumar bha iaki dieng kiba la thung bad ka maham tyngeh ia kito kiba ju mlien ban thang ia ki khlaw bad lada ka seng ka lap kan sa pynshitom ia kiba leh tohmet iaka mei mariang.
Ha kawei pat ka liang, ka KSU Shillong Mihngi Circle kala thung 150 tylli ki tynrai dieng ha ki bynta bapher bapher jong ki shnong kiba hap hapoh ka jing peit jong ka Shillong Mihngi Circle bad ha kane ka jingthung dieng la iashimbynta da ki khynnah skul bad ki nongtrei jong ki Ophis Sorkar.
