Shillong, Nailur 15 : Ka Tnad Meghalaya Police kala thung ia ka kynhun Special Investigaton Team (SIT) ban tohkit halor ka jingiap jong i Khynnah 4 snem, iba la jah rngai nala iing ha Nongrah Nonglum.
Ia ka metiap jong ine i Khynnah la lap bala bhan da u maw ha kawei ka jaka lang umslap jong ka Iing ba dang shna thymmai hajan ka Iingsah jong i hi, hynne ka step sngi Nyngkong.
“Yn sa thung ia ka SIT ban tohkit ia kane ka jingjia khnang ban lap ia ka jingshisha bad ruh ban lap ia ki briew kiba donkti” ong u Superintendent of Police Bah Vivek Syiem haba iakren bad ki nongthoh khubor.
Ia ka SIT yn khlieh da u SP (City) Bah Herbert Kharkongngor, hapoh ka jingkhmih bad jingai buit jong u SP ka East Khasi Hills.
I Heprit Insaphira Lyngdoh Mawnai ila jah rngai nala ka jong ka phyllaw iing ha ka step Sngi U Blei na Nongrah Nonglum katba ki Kmie Kpa ki dang iohthiah hala iing.
Ka kynhun kaba iawad, kynthup ki bahaiing hasem, ki dkhot ka VDP, ki trai Shnong bad ki Pulit ha ryngkat ka kynhun dog squad, kila wad kylleng ki jaka hynrei kim shym la lapdien satia.
Ki Pulit kila phah jingtip ia kane ka jingjah sha baroh ki Polit Station bad la pynmih ruh ia ka notice ban iawad lang ia ine I Khynnah.
Hynrei ia ka metiap jong I, la lap noh ha ka step sngi Nyngkong na ka iing ba dang shna thymmai, kaba don hi marjan ka iingsah jong i.
Ki bahaiing i Insaphira kila ujor da ka ejahar hapoh ka Police Station.
U Bah Vivek u pyntip ba ia ka met jong I Insaphira la lap da uwei u nongbylla uba trei ha kane ka Iing, kaba jngai kumba 100 meter na ka Iingsah jong i.
“Hadien ka jinglap ia ka met, ka kynhun Forensic kala leit sha ka jaka bad la sei ia ka met bad rah noh sha NEIGRIHMS. Ia ka post mortem la leh hi hynne ka sngi bad ngi dang ap ia ka kaiphod (kumjuh ruh ia ka jingtohkit forensic) ula ong haba pyntip ba la register case ia kane ka jingjia kum ka jingshah pyniap.
U SP u iathuh ba ki Pulit ki dang bishar ia ki sakhi, kynthup u nongbylla uba lap ia ka metiap bad yn nang pyn iar ia ka jingtohkit katba nang ioh lum ia ki sakhi satar.
 ban tohkit halor ka jingiap jong i Khynnah 4 snem, iba la jah rngai nala iing ha Nongrah Nonglum.){kind=link}