Imphal, Jylliew 01 : U Myntri kam Pohiing ka Ri Amit Shah hynne ka sngi Palei, ula pyntip ba ka Sorkar Pdeng kala thung ia ka Committee ka ban tohkit halor ka thma iapher Jaidbynriew kaba jia ha Manipur naduh ka 3 tarik u Jymmang.
U pyntip ba ia kane ka Committee yn khlieh da u Judge bala shongthait jong kano kano ka High Court haba pyntip ruh ba u Lat ka Jylla Manipur yn khlieh ia ka Peace Committee ha ryngkat ki kynhun ka imlang sahlang.
“Ka CBI ruh kan sa pynlong ia ka jingtohkit ia ki katto katne ki jingjia bad nga kular ia ki paidbah ka Manipur ba ka jingtohkit kan long khlem kano kano ka jingshah liang bad jingibein ipoh bad kiba donkti hi kin ioh ia ka jingpynsajia kaba tyngeh” ong u Amit Shah.
Ula ong ba ha kine ki shibnai bala leit noh, kila don ki jingjia ba itriem ha ka Jylla Manipur haba pynpaw ruh ia ka jingnsgew lem sha ki longiing kiba la duh noh iala ki jong ki baieid bathoin ha kane ka thma iapher Jaidbynriew.
Ha kajuh ka por, u Amit Shah ula kyntu ia ki paidbah ba kim dei ban ngeit ia kino kino ki khubor hamsaia bad ban pynneh ia ka jingshongsuk hapoh ka Jylla.
U Myntri kam Pohiing ka Ri u pyntip ba ka Sorkar pdeng kala peit thuh bha ia baroh ki jinglong jingman hapoh ka Jylla.
Nalor kane, u pyntip ba kum u Myntri kam Pohiing ula leit iuhkjat ruh ha kylleng ki jaka ka Jylla Manipur ha kine ki lai sngi bala leit noh ba kynthup ia ka Imphal, Moreh bad Churachandpur bad pynlong ruh ia ki jingialang bad ki heh Ophisar ban lah wanrah pat ia ka jingsuk hapoh ka Jylla.
Ula pyntip ba ula iakynduh ruh ia ki kynhun bapher bapher jong ka Jaidbynriew Meitei bad ki Kuki ban pynsngewthuh halor ka jingdonkam ban iasuk noh.
