Shillong, Iaiong 03: Ka sorkar jylla kala thung ia ki Ar ngut ki Nongiasaid Ain ka jylla kum ki Additional Advocate General ka jylla bad ia kawei ka Nongiasaid Aiñ kum ka Senior Government Advocate ka jylla.
Ha ka 23 tarik u Lber 2023, u Secretary ka tnad Law u Bah Cyril V Diengdoh ula pynmih iaka jingpynbna ba la thung ia ki Ar ngut ki Senior Advocate kata ia u Khalid Khan bad ia ka Tshering Yangi B kum ki Additional Advocate General ka jylla.
U Bah Cyril ula pynmih iaka jingpynbna haka 29 tarik u Lber, ba ka sorkar jylla lyngba ka tnad Law, kala thung iaka Nongiasaid Aiñ ka jylla ka Kong NG Kynta kum ka Senior Government Advocate jongka jylla.
U Advocate General ka jylla u Amit Kumar u dang bteng ban bat ia katei ka kam, katba u Bah ND Chullai bad u B Bhattacharjee pat ki dang bteng ban bat hi kum ki Additional Advocate General.
La ioh jingtip ba ka jingthung ka sorkar ia kitei ki nongiasaid Ain kalong ba kin iasaid ia ki mukotduma jong ka sorkar hapoh ka iingkashari Meghalaya High Court.
Dang shen, ka sorkar jylla kaba la ialam da ka NPP kala thung iaki 21 ngut ki MLA kum ki Chairman, Co Chairmen bad Adviser jong ka sorkar jylla.
