Shillong, Lber 10 : Ka Sorkar Jylla kala thung ia ka Jana Urban Space, Bangalore ba kan pyntrei ia ka project ban pynwandur thymmai ia ka Barik.
Kat kum ka jingiathuh u Symbud Myntri Rangbah ki kam pynroi Sor bad Sniawbhalang Dhar hapoh ka Iingdorbar, ka Tnad kala dep ban khot tender ia ki kompani ban pynwandur ia ka project na kylleng ka Ri.
U pyntip ba ka jingpynwandur thymmai ia ka Barik, ka jaka ba don ki jingtei barim bad ha ka jaka ba khapngiah eh hapoh sor, ka donkam ia kiTechnical Expert bat bit bha.
Ban pynthikna ia ka jingjop jong ka project, u Bah Sniawbha ula ong ba ka Tnad kala pynlong bniah bha ia ka jingkhot tender.
“Kane ka kam ka dei kaba la leh da ka jingthmu ban jied ia ka kompani kaba la pyntrei teng ia ka kam ban pynwandur ia kum kine ki project ha ki jingtei bala rim” ula ong haba bynrap “Ia kane ka kompani la jied haba pynshong nongrim ia ka jinglah jong ka ban pyndep ia ka project ha ka dor baka biang bha bad kiwei kiwei”.
Nalor kane, u bah Sniawbha ula ong ba ia ka jingpynwandur (design) la iakren bad baroh ki kynhun ba don bynta bad la mynjur ruh da ka Committee jong ka Tnad.
Ka dor jong ka design consultancy ka long T.25,00,000, ula pyntip.
