Shillong, Rymphang 20: U Director of School Education & Literacy Swapnil Tembe ha ka sngi Palei ula ong ba ka Sorkar kala thung ia ka Committee ha ka kyrdan jong ka DSEL ban pynthikna ia ka jingpyllait biang por ia ka tulop sha ki skul bapher bapher ka Jylla.
Haba iakren bad ki nongthoh khubor, u Tembe ula ong ba kane ka Committee kala iakynduh manla u snem ban bishar kam halor ka jingpyllait ia ka tulop sha ki skul bapher bapher.
Ula pyntip ba haba iadei bad ki skul Sorkar jong baroh ki kyrdan, ka Sorkar kala pyllait ia ka tulop haduh u bnai Kyllalyngkot.
“Hooid ki don ki khep kiba mih ki jingthut hangne hangtai. Ki don kito ki jingsiew ba leh online bad lehse ka lah ban dei ruh namar ki katto katne ki daw kum ka jingkylla ha ki DDO (Drawing and Disbursing Officer) bad kiwei kiwei. Ki don bun ki daw bad ta ka daw katto katne ki skul ki lah ban nym pat ioh ia ka tulop. Hynrei, kaba sngewtynnad ka long ba ngi la shong bishar kam manla u bnai. Ngi shong jingialang ha man ka taiew ba nyngkong ban peit ia ka kam” ula ong.
Haba iadei bad ki skul ba iarap ka Sorkar (Aided), u Tembe u iathuh ba ia ka tulop la ju pyllait man ka lai bnai haba bynrap ka Sorkar kala dep pyllait haduh u bnai Nohprah.
“Ia kane ka quarter ba mynta, kaba dei ka quarter ba khatduh, ngi la shimkhia kyrpang ia ka” ula bynrap.
