Shillong, Naitung 12 : Ka Supreme Court Collegium ha ka sngi Palei, kala phah ban thung ia u Justice Tashi Rabstan kum u Chief Justice ka Iingkashari Meghalaya High Court.
Ia kane ka rai la shim da ka Collegium bala khlieh da u Chief Justice ka India DY Chandrachud.
U Justice Rabstan u dei ban shimti kum u Chief Justice hadien ka jingshongthait jong u Chief Justice S Vaidyanathan ha ka 24 tarik Nailar.
Ka Collegium kala ong ba u Justice Rabstan u dei u Judge bala rangbah tam jong ka High Court ka Jammu & Kashmir bad Ladakh bad un dei u Chief Justice ba nyngkong na ka thain Ladakh.
U Justice Rabstan u dei uba la kha ha ka 10 tarik Iaiong, 1963 ha Skurbuchan, ha Leh Ladakh. Ula pyndep ia ka graduation bad LLB na ka University ka Jammu. Ula rung kum u advocate bad ka Bar Council ka Jammu & Kashmir ha ka 6 tarik Lber, 1990 bad sdang ban iasaid ain haph ka High Court ka Jammu & Kashmir bad Ladakh.
Ula shah thung kum u Additional Judge ka High Court ha u Lber 2013 bad ula shah thung kum u Judge ba pura ha u Jymmang 2014.
Ula shakri ruh kum u Acting Chief Justice ka High Court ka Jammu & Kashmir bad Ladakh ha u snem 2022.
