Shillong, Risaw 13 : Ka North Eastern Hill University (NEHU) ha ka sngi Thohdieng, kala thung ia ka fact Finding Committee (FCC) ka ban tohkit halor ka jingkynnoh shah thombor u samla pule Naga ha Tura Campus jong ka skulbah.
Kane kala mih hadien ka jingujor bala ioh pdiang na ka Naga Students’ Union (NSU) halor ka jingshah rahbor uwei u dkhot, uba pule ha Tura Campus. Kane ka jingjia kala jia ha ka step phyrngap jong ka 8 tarik Risaw.
Kat kum ka kyrwoh na NEHU la iathuh ba ia kane ka Facat Finding Committee yn khlieh da Dean jong ka School of Human & Environment Sciences Prof Lucy Zehol.
“Ka Prof Lucy Zehol kan sa leit noh mardar sha NEHU Tura Campus ban sdang ia ka jingtohkit. Kane ka Committee kan trei shitom bha ban sei madan ia ki daw halor kane ka jingjia, ban ithuh ia ki briew ba donkti bad ban wad ia ki jingshisha halor kane ka kam” kala ong.
Ka kyrwoh ka ong ruh ba ka NEHU ka bat ia ka policy treikam ba ym ailad satia ia kum kino kino ki jait thombor (ragging) hapoh ka University.
“Lada shem ba kane ka jingjia ka dei kaba shisha, ki briew ba donkti kin ioh ia ki pynshitom a tyngeh kat kum ki kyndon ain ka University bad ruh ki ain jong ka Ri” kala ong.
Ha kajuh ka por, ki bor pyniaid ka NEHU kila ai ia ka jingkyrshan ia une u samla ba shem lanot bad kular ba ka Committee ka kloi ban ai ia kano kano ka jingiarap kaa donkam kynthup ka jingiasyllok ban pynthikna ia ka jingshngain bad ka bha ka miat une u samla.
