Shillong, Nailar 03: Ka seng Hynniewtrep National Liberation Council (HNLC) hynne ka sngi balang, kala aibor ia u Vice Chairman bad arngut ki Secretary ba kin leit iashimbynta sha ki jingialang iakren iasuk hapdeng ka Sorkar India, ka Sorkar Meghalaya bad ka Seng.
“Ka HNLC kala aibor ia u Vice Chairman Bah Manbhalang Jyrwa, Political Secretary Bah Aristerwell Thongni bad u Foreign Secretary Bah Phrangkupar Diengdoh kynthup ia arngut ki Personal Security Office (PSO) Bah Arborlem Marbaniang bad ah Storgy Lyngdoh ba kin leit iashimbynta ha ka jingialang iakren iasuk hapdeng ka Sorkar India, ka Sorkar Meghalaya bad ka HNLC” ong u Bah Sainkupar Nongtraw, General Secretary cum Information Secretary ha ka kyrwoh.
Kat kum ka jingong jong u, ka HNLC kala sdang ia ka jingtyrwa iakren iasuk naduh u snem 2004 hynrei kam shym la seisoh satia, watla ka Congress ka dei kaba don ha ka bor synshar ha Jylla bad ha Delhi ruh kumjuh.
“Kumjuh ruh ha u snem 2014, ka HNLC kat kum ka jingkyrpad u Lat barim ka Jylla u RS Moosahary ban wan shakhmat sha ka miej iakren iasuk, ka HNLC kala pdiang ia kane ka jingtyrwa hynrei kane kajuh ka sorkar Congress kala pynpulom” ula ong.
Haba iaroh ia ka Sorkar Meghalaya Democratic Alliance (MDA) ba ialam da ka NPP, u Bah Sainkupar ula ong “Mynta ka kynta ka ngeit skhem ia ka jingshimkhia jong ka Sorkar MDA bad ka jing mynjur jong ka Sorkar NDA na Delhi. Ha kine ki khyndiat bnai, ka jingiakren kala iaid ha ka lynti kaba dei namar ka jingiatreilang ba la ai da ka Sorkar Jylla bad ka Sorkar India”.
“Ka rai ban phah ia ki Heh Nongialam ban iashimbynta ha ka jingiakren iasuk ka dei namar ka jing shaniah kaba la tei hapdeng ka HNLC bad ki Ksiang bala thung kata u AK Mishra na ka Ministry of Home Affairs (MHA), u Bah Peter S Dkhar (Retd IAS) bad u Nongmihkhmat jong u Bah Sadon Blah jong ka HNLC” ula bynrap.
Une u Nongialam ka HNLC ula pynpaw “Ngi kwah ban ai khublei ia ka Sorkar ka ba la ai ia ka lynti iaid kaba shngain bad ha kajuh ka por ngi ngeit ba kan ym don ka jingiapein bad ka jingshngain jong ki Nongialam jong ngi. Ki Nongialam jong ngi ki dei ban sngew shngain bad ba ka jingai jaka sah jong ka Sorkar kam dei ban long kum ka jingset slung ia ki tang ha kane ka jaka sah (house arrest)”.
U Bah Sainkupar u ong ba katba ka jingiakren iasuk ka dang iaid shakhmat, ka seng ka da kut jingmut shisha ban pynurlong.
“Ngin nym khein sting satia bad kyrmen ia ka jingmih kaba seisoh. Hynrei lada mih kano kano ka khep kaba pynpulom ia ka jingiakren iasuk, ki Nongialam jong ngi ki dei ban ioh wan phai da kaba suk shala ki jong ki Headquarter kat kum ka jingiapynbeit bad ka Sorkar” ong u Bah Sainkupar.
“Ka HNLC kala kut jingmut shisha halor ka jingiakren iasuk bad ngi kyrmen ba kane ka juh ka jingkut jingmut kan mih naka Sorkar. Ngi ngeit ba kane ka jingiakren iasuk ka dei ban iaid sted bad ban lah noh ruh ha ka ban pynmih ia ka rai khnang ba ka jingshongsuk shongshngain kan wan ha ka Jylla”.
