Shillong, Risaw 15: Ka Iingkashari Meghalaya High Court kala hukum ban thung ia ka Committee ki lai ngut ki dkhot ki ban bishar bniah ia ka jinglong jingman ba mynta bad ka rukom treikam jong ki weighbridge bad ki weigh pads kiba don hapoh ka Jylla.
Kane ka rai kala mih haba bishar ia ka Public Interest Litigation (PIL) bala mudui da u nongtrei mon sngew bha Tenny Dard M Marak, kaba kynnoh ia ka jingduhnong kaba khra ha ka khajna namar ka jingbym treikam bha bad jingbym biang ki tiar ha ki weighbridge.
“Ngi tyrwa ban thung ia ka Committee ki lai ngut ki dkhot ki ban wad ia ka rukom long jong ki weighbridge bad weigh pad mynta ha ka Jylla bad la ki dei kiba dang treikam pura”ong ka Division Bench ba kynthup ia u Chief Justice Soumen Sen bad Justice W Diengdoh ha ka hukum ba pynmih ha ka sngi Ba-ar.
“Halor ka jingkyrpad jong ki nongiasaid ain ki liang mamla, ia kane la kam la rah ban bishar haduh ka 16 tarik Naiwieng 2025” kala bynrap.
