Boko, Rymphang 23 : Ka thain Shatei Lam Mihngi shen kan sa poi ha ka kyrdan ba khlieh hapoh ka Ri ha ka liang ka jingpynmih ia ka jri.
Ka Central Rubber Board (CRB) kala pyllait ia ka skhim ba kyrpang ban pynshlur ia ki nongrep na Assam, Meghalaya bad kiwei ki Jylla ka thain ba kin thung bad pynmih ia ka jri.
Ka Omega Nursery kala buh ia ka jaka ba 40 hectare ha Umshru-Paham, Meghalaya kum shibynta naka project ka Sorkar ba tip kum ka ‘Atmanirbhar Bharat’ project.
U Anshuman Singhania, Chairman, Automotive Tire Manufacturers’ Association (ATMA) bad JK Tyre Vice President, ula leit jurip ia kane ka nursery ha ka sngi Palei bad la synran ia u da u Rajiv Budhraj, Director General ka ATMA, Dr. Ashritha, Project Coordinator, V. A. Shakeer, Commissioner, Rubber Board.
Haba iakren bad ki nongthoh khubor, u Singhania ula kular ba baroh ki kompani ba long dkhot jong ka ‘ATMA’ kin iatreilang ha kaban pynurlong ia ka jingphohsniew u Myntri Rangbah Duh ka Ri Narendra Modi ban pynlong ia ka ri India kaba lah ban pyndap hi nalade nadong hadong.
U iathuh ba ka ATMA kan kynshew ha kaban seng ia ki karkhana pynmih jri bad Tyre ha Assam bad ha ki Jylla ba marjan hadien ba ka jingpynmih ia ka jri kala long pura. Ula khot ia ka jingiatreilang jong ki Sorkar Jylla, ki bor shnong bad ki paidbah halor kane ka bynta.
U kyrmen ba da ka jingseng ia ki karkhana ban pynmih ia ki jait mar bapher bapher kynthup ka jri bad ki Tyre kan aikam aijam ia ki hajar ngut ki briew bad kan kyntiew ruh ia ka ioh ka kot bad ka jingim jong ki nongshongshnong ka thain.
Ka ATMA kan sa pynlong ia ka prokram kyrpang ba arsngi ha Borjhar, Guwahati ha ka sngi Thohdieng ka ban wan iashimbynta da ki kompani pynmih Tyre ba hehduh ka Ri bad ki Heh ka Central Rubber Board.
