Shillong, Jylliew 24: U Myntri Rangbah ka jylla u Conrad K Sangma hynne ka Sngi Baar ula aiti ia ka Grants-In-Aid sha ki 26 tylli ki Sports Association ban pynkhreh ia ki kynhun ialehkai ki jongki na ka bynta ka 39th Meghalaya Games kaban long ha u snem 2027.
Ka jingkyrshan pisa kaba kot T.39,17,64,000 Klur la aiti sha ki kynhun ialehkai ka Meghalaya kaba kynthup ia ki Meghalaya State Olympic Association (MSOA) bad 26 tylli ki Sports Association.
Ia katei ka pisa la ai kum ka Grant-In-Aid na ka bynta ki nongialehkai kiba pynkhreh ia ka 39th National Games 2027, kaban pynlong da ka jylla Meghalaya.
“Ka jingthmu kaba hakhmat jong kane ka prokram ka long ban sdang ia ki jingpynkhreh da kaba ai ia ka jingkyrshan pisa ia ki Sports Association.Kaei kaba pynlong kyrpang ia kane, kadei namar ba ka long ha ka sien kaba nyngkong eh hapoh ka ri, ia ka bhah tyngka la ai beit beit sha ki synjuk ialehkai. Kane ka jingleh ka ai ka jinglaitluid kaba pura ia ki ba kin shim ia ka rai kabab ha kumno ban pyndonkam ia katei ka pisa katkum ka jingdonkam shimet ka jongki. La kadei ban wai ia ki Coach, ban thied ia ki tiar ki tar ialehkai, ban pynlong ia ki Training Camp ne Talent Search Program, ka Associations ka ioh ia ka bor kaba kylluid ban pynwandur ia ka jingthmu bad ban leh ia ki kam katkum ki jingsngew ki jongka” la ong u Myntri Rangbah.
U Myntri Rangbah ula ong, ba kane ka sienjam kam dei eh tang ban ai jingiarap da ka pisa hynrei kadei ruh shaphang ka jingshaniah. Ula pynsngew ia ki rai kiba la shim da ka sorkar ban pynkhamti ia ka jingkitkhlieh beit beit ha ki Association, da kaba ngeit skhem ba ki tip kham bha ia kaei kaba dei ban leh.
Ula buh ruh ia ka thong ia ki Association ba kidei ban don ia ka thong ban khur haduh 50 tylli ki takma ha ka National Games 2027.
“Ka jingpynkhreh dang kloi bad ka jingkynshew tyngka ki long u shabi. Kane ka prokram ka long shi bynta jongka jingiohi jngai ban kyntiew ia kam ialehkai ha ka jylla Meghalaya, kaba kynthup naduh ki jingtei kiban kot sha ka T.1900 Klur bad ka thong jong ka lawei hi ka long ban noh synniang sha ka jingialehkai bha ka ri India ha ka jingialehkai Olympic kaban long ha u snem ha u 2036”, ong u Myntri Rangbah.
Ula ong ba ym dei ban shim ba ka National Games ba kadei ka jingiakob ialehkai kaba tang shisien, hynrei kan long kum ka lynti jong ka jingiaid.
“Kane ka jingkyrshan kadei da ka jingthmu ban tei ia u paia uba kshem bad uba neh skhem na ka bynta ka kam ialehkai hapoh ka jylla Meghalaya” ula ong.
Katba u Myntri ka tnad Sports u Bah Shakliar Warjri ula ong ba kane ka sngi kadei ka sngi kaban sah jingkynmaw ha ka histori bad ong ba kane ka kyrdan jong ka jingkyrshan bad ka jinglaitluid kadei kaba ym pat ju ai satia mynno mynno ruh sha ki Sports Association.
Ula ong ba ka sorkar kala pyni ia ka jingbahkhlieh ym tang da ki ktien hynrei kala leh da ki kam.
Katba u Working President ka MSOA u Bah John F. Kharshiing ula ai khublei ia ka sorkar jylla bad ong ba ki sngi kila sdang ban iaid bad mynta ka jingkitkhlieh kan shong ha ki Association ban pynmih ia ka resol.
Ha kane ka prokram, u Myntri Rangbah ula ai jingiarap ruh T.1 Lak na ka tnad Sports ia ka Rifiness Warjri kaba dei ka kynthei kaba dang khynnah tam ha ka rta kaba 20, kala kiew pyndep ia u lumthah Mount Everest. U Myntri Rangbah ula pynbna ruh ban ai sa T.5 Lak ia ka lyngba ka Chief Minister’s Special Grant.
