Shillong Nailar 17: Ar ngut ki Khasi kiba sah ha ka shnong Kalakhal kaba hap ha Cachar District, Assam kila mynsaw jur na ka jingshah hiar thma ha ki runar Muslim kiba suba jur ba ki dei ki nong Bangladesh.
Kane ka jingjia kala jia ha ka 15 tarik u Nailar, katba 6 ngut ki Khasi ki dang leit sha ka bri kwai bri tympew, hynrei ha ka jingbym poi pyrkhat ki muslim na Bangladesh kiba la rah ia ki tiar pynmynsaw, kila wan thombor ia ki.
Haba iakren bad u President jong ka KSU Barrack Valley u Bah Walton Rymbai ula ong, “Ha ka 15 tarik u Nailar, katba 6 ngut ki Khasi ki dang leit sha bri kwai, bri tympew, 25-30 ngut ki Muslim na Bangladesh kila wan hiar thma kynsan bad kila ioh ban tied bad pynmynsaw ia ki 2 ngut katba ki 4 ngut kiwei pat kila ioh phet da ka said bad lait na ka jingma.
“Ki 2 ngut kiba la mynsaw jur ki kynthup ia u Raju Kasar bad u Vikash Synkor kiba na ka shnong Kalakhal bad kine mynta ki don hapdeng ka jingshah sumar ha Sichar Medical College & Hospital” ong u Walton Rymbai bad ka iathuh ba kine ki bahaiing bahasem ki don ryngkat lang bad ki.
Ula ong, ba kane ka jingshah thombor ki Khasi kam dei tang mynta hynrei kadei kaba la ju jia man la ka por bad mynta ki paid Khasi kiba sah ha Kalakhal ki dap da ka jingtieng bad jingsyier namar ka jingbyrngem byrsit jong ki Muslim na Bangladesh kiba la wan ban kyntur pud be-ain ia ki jaka jong ki Khasi.
Une u Nongialam ka KSU ula ong “Ngi lah wan iakynduh ia u Superintendent of Police (SP) bad Deputy Commissioner (DC) ka Cachar District bad kila pynthikna ia ngi ba kin shimkhia ia kane ka jingjia bad 2 ngut ki briew kiba donkti ha ka kam thombor kila shah kem”.
“Ka seng kam pat sngewhun halor ka jingioh kem tang ia kine ki arngut bad ngi kwah ba dei ban kem ia baroh 25-30 ngut kiba la donkti ha ka kam thombor bad dei ruh ban pynshitom da kaba tyngeh ia ki katkum ki kyndon aiñ” ula ong.
Nalor kane, kila dawa ruh ba dei ban ai ka jingiada bad jingshngain ia ki paid Khasi kiba sah ha katei ka thain namar ki paid Khasi kim nud shuh ban leit sha iew sha hat bad wat ki khynnah ruh kim nud shuh ban leit sha skul bad ula iathuh ba ki pulit kila wan ban ap pahara ha katei ka thain hynrei ki paidbah hi haduh mynta ki dang im hapdeng ka jingtieng bad jingsyier na ki jingbyrngem byrsit jong ki Muslim kiba na ri Bangladesh.
“Lashai ka sngi, ki nongialam kin shong ia ka jingialang ban ia pyrkhat halor kane ka jingjia bad ngin sa shim ia ka rai” la pynkut u nongialam ka KSU.
Ha ka jingujor, la kdew ba ki Muslim Mia kila byrngem ban wiangding ia ki shnong kiba sah ki Khasi bad ruh ban bat ia ki khynnah Khasi kiba thmu leit skul ban leh be-ijot ia ki.
