Shillong, Nohprah 19: San ngut ki nongshongshnong ka shnong Umniuh Tmar, East Khasi Hills, kila shah lute ha ki runar na ri Bangladesh katba ki dang thmu ban leit peitkai ia kawei ka jingkieng ba dang shu dep shna thymmai ha kawei ka wah ha ka thain Khappud.
Kane ka jingkieng ka dei kaba dang shu shna halor ka wah Mawkylla kaba pyniasoh ia ka shnong Umniuh Tmar bad ka Nongjri.
Kat kum ka khubor ba ioh lum, kine ki 5 ngut ki kynthup ia 4 ngut ki kynthei bad uwei u shynrang.
La iathuh ba kine ki 5 ngut kila leit sha kane ka jaka da ka kali hynrei haba poi ha kawei ka jingkieng kaba rit, ki runar kila khang ia ka lynti iaid da ki dieng bad ki maw bad mar kumta hi, kumba 4 ngut ki nonglute na Bangladesh kiba rah ia ki wait bad nar rod, kila thombor bad phah sei lut ia baroh ki jingdon jingem.
Kine ki nong Umniuh Tmar kila leit ban ujor ejahar ia kane ka jingjia ha Pynursla Police Station bad pyntip ba kine ki nong lute kila lute ia lai tylli ki mobile phone, kawei ka tablet bad shijur ki sohskhor ksiar.
Ki Nongialam Shnong haba ioh jingtip ia kane ka jingjia, kila pyntip sha ki Pulit bad ryngkat lang, kila iahiar sha katei ka jaka ban pynlong ia ka jingtohkit.
Lah ban kdew hangne ba katei ka jaka kaba ki nong Bangladesh ki pyntriem ka dei kaba jngai tan gkumba 1km na ka jaka ba ker sainar shiah.
