Shillong, Jylliew 20 : Ka kynhun ki shipai Border Security Force (BSF) la kynnoh ba kila leit rung jubor hynnin ka miet shiteng synnia ha kawei ka Longiing jong ka shnong Kuliang, East Jaintia Hills bad thombor naphang ia ki briew kiba don ha kane ka Iing kynthup ka jingjrong kti bad leh khlem akor ia ka khynnah kaba dang 15 snem ka rta.
View this post on Instagram
Ia kane ka kam ki shipai BSF la sakhi ruh lyngba ka video kaba la saphriang paidbah ha ki rynsan social media. Kane ka Iing ba shah thombor ka dei jong ka kong Martina Pohshna.
Ka kong Martina Pohshna hynne ka step sngi Palei, kala leit ban ujor da ka ejahar pyrshah ia ki shipai BSF hapoh ka Umkiang Police Patrol Post kaba don ha Umkiang.
Kat kum ka ejahar, kane ka Longkmie ka pyntip ba ha ka miet 19 tarik por, 11:30 baje, lai ngut ki briew kiba phong jain paidbah bad kam ialade kum ki BSF kila an kynjat ia ka jingkhang bad rung jubor hapoh ka Iing jong ka katba ma ka bad ka Iing ka sem baroh kawei, ki dang iabam ja miet.
Ka iathuh ba u kurim jong ka Bah Shanroi Lyngdoh Lyngkhoi u dang leit thet kti ha katei ka por ba rung ki BSF bad kumta hi, kila shu thombor beit beit ia u khlem ka daw. Ka iathuh ba kine ki briew kila shim ruh ia u sdie na Iing lem bad ka tari ba ki wanrah ban thombor ia ka Longiing baroh kawei.
Ka kong Martina ka pyntip ba ma ka lem bad ka Khun ba dang 15 snem, kila pyrshang ban knieh ia u sdie hynrei kila shah khynniat sharud bad hadien kane, kila patan ia u kurim shabar Iing bad kila shoh dusmon ia u haduh bala kdiah ka shyiengkrung. Ka pyntip ba ma ka lem bad ka Khun kila pyrshang ban leit iarap ia u Kpa ka Iing hynrei kila shah thom biang tad haduh ba kin da mih bad phet.
Ka Kong Martina ka pyntip ba ha ka por 12:30 baje mynstep, kine ki briew kila wan biang ha ryngkat 15 ngut kiwei pat ki briew ban shoh ia u Kurim jong ka bad kila knieh ruh ia ka phone jong ka Khun.
Kala kynnoh ba kine ki shipai kila jrong kti ia ka khun na ki bynta jong ka shadem bad haba ka pyrshang ban leit iarap ia ka khun, kala shah kynjat pynban na met. Ka kynnoh ba kine ki briew kiba khnoit jubor ruh ia ka shyntur jong ka Khun haduh ba kala pang jur bha.
Ym tang katta, kala kynnoh ba kine ki shipai kila pynap ruh da ka suloi bad byrngem ban siat. Ka iathuh ba wat hadien ba kila mih na iing, kine ki shipai kila byrngem ia ka Khun bad ong ba kin sa peit aiu kan jia ia ka ynda ka wan sha Umkiang.
Kane ka Longkmie ka pyntip ba ia ka video bala saphriang paidbah, la ring da uwei u nongshongshnong ka thain, ka ban long ruh kum ka sakhi.
Ka kong Martina kala kyntu ia ki Pulit ba Umkiang ba kin register case pyrshah ia kine ki shipai kat kum ki kyndon ka Ain bad ban thwet nalor ban kem ruh ia ki kat kum ki kyndon ain.
