Shillong, Jymmang 26 : U Myntri Rangbah ka Jylla Conrad K Sangma, ula phah da ka shithi sha New Delhi ba kyrpad ban pynrung lang ia ka ktien Khasi bad Garo ha ka eksam thungkam Gramin Dak Sevak, Branch Post Master bad Assistant Branch Post Master ha ki BPO ba don ha Jylla Meghalaya, ka ban sa long shen.
U Conrad ula phah ia kane ka shithi ha ka 23 tarik Jymmang ha u Myntri ka Ministry of Communication u Ashwini Vaishnaw haba kyrpad ia ka Ministry ba kan pynkylla ia ka draft model notification jong ka Department of Post, kaba buh kongsan ia ka ktien Hindi bad English kum ka ktien lajong, kaba donkam ha ka jingthungkam ia ki Gamin Dak Sevak ha Meghalaya.
“Kane ka kyndon kan pynduna ia ka lad iohkam jong ki samla trai Jylla namar ka jinghap ban iakhun bad ki samla wad kam kiba na shabar ka Jylla kiba lah ban ioh bun marks ha kine ki artylli ki ktien (Hindi bad English)” ong u Conrad.
Kat kum ka jingong jong u, “Napdeng kiba samla kiba shah jied na shabar ka Jylla, khyndiat eh ki ban wan shimti ai ka kam ha Meghalaya namar ka jinglong kyndong bad ka jinglong ki jaka. Wat kito kiba wan shimti ia ka kam kila jied ban kynriah noh shala ki jong ki Jylla da kaba jied ia ka lad ba ki ioh kat kum ka Service Rule ba don jong ki Nongtrei Postal hadien ba kila dep shakri shisnem. Namar kata, ka jingthmu ban buh ia ki BPO ha ki Shnong Nongkyndong ka Jylla Meghalaya kan long kaba shah jop noh”.
“Namar kata, nga kyrpad ia ka Ministry jong phi ban pynkylla ia ka Draft Model Notification jong ka Department of Post da kaba buh kongsan ba dei ban nang bad tip ia ka Ktien lajong ba kren ha Jylla Meghalaya. Kane ka lah ban dei ka Ktien Khasi ne Garo kum ka ktien lajong na ka bynta ki samla wadkam ba kin ioh jied. Kane kan long ha ryngkat ka ktien Hindi bad English kumba la leh ha Assam, Manipur bad Mizoram” ong u Conrad.
Haba pynpaw ba ka jingthungkam kan sa sdang noh shen, u Conrad ula ong “Nga Kyrpad ia phi (AshwiniVaishnaw) ba phin mynjur ia ka jingkyrpad ka Meghalaya namar kane kan ailad ia ki samla bala nang la stad bad ba khlem kam ka Jylla ba kin shim kabu ia ka lad ha ka ban iohkam iohjam”.
Lah ban kdew hangne ba ka seng FKJGP dang ha kine ki khyndiat sngi kala leit dawa ia ka Sorkar Jylla ban tuklar halor kane ka eskam thungkam hapoh ka Department of Post ka Sorkar Pdeng halor ka jingbuh kongsan ia ka ktien Hindi bad English kum ki ktien lajong.
